चुनावी तालमेल दवावमा हुँदैनः अध्यक्ष पुन

रुपन्देही । नेपाली कांग्रेस लुम्बिनी प्रदेशका अध्यक्ष अमरसिंह पुनले चुनावी तालमेल कतैको दवाव र कसैको लाभमा नभएर आवश्यक्ता अनुसार स्थानिय तहबाट मात्र गरिनु पर्ने बताएका छन् । उनले पार्टी कार्यकर्ताहरुको सुझाव र स्थिति हेरेर मात्र स्थानिय तहबाट गरिँदा उपयुक्त हुने बताए ।

कांग्रेसको ‘घर घर जाउ कांग्रेस जिताउ’ भन्ने अभियानको क्रममा पार्टीको क्षेत्रीय कार्य समिति क्षेत्र नं- २(ख) को आयोजनामा भएको आमसभा कार्यक्रममा उनले सो कुरा बताएका हुन् । उनले चुनावी तालमेलका लागि जिल्ला, क्षेत्रीय, नगर र गाउपालिका, वडाहरुबाट सुझाव संकलन गर्नुपर्ने बताए । स्थानीय तहमा गरिने चुनावी तालमेलमा प्रदेशबाट कुनै हस्तक्षेप भने नगर्ने उनले बताए ।

उनले आउने बैशाख ३० मा हुने निर्वाचनमा पार्टीले जित्ने उम्मेदवारलाई टिकट दिनुपर्ने बताए । उनले भने, ‘नयाँ या पुरानो भन्ने हुँदैन, पार्टीले जित्ने उम्मेदवारलाई टिकट दिनुपर्छ ।’ एमसिसी देशको विकासका लागि आएको अनुदान रहेको र यसको सदुपयोग गर्नुपर्ने बताउँदै उनले एमसिसीबारे आएको भ्रमलाई पार्टी नेता कार्यकर्ताहरुले चिर्नुपर्ने बताए ।

सो अवसरमा पार्टीका प्रदेश महामन्त्री सुरेन्द्रराज आचार्यले पार्टी, नेता, कार्यकर्ता एक भएर चुनावमा जाने बातावरण बनाउनुपर्ने बताए । उनले जित्ने उम्मेदवारलाई नै पार्टीले प्राथमिकतामा राखेको बताउँदै जिल्लाका १० वटै पालिकामा कांग्रेसले जित्ने दावी गरेका थिए ।