देउवाको गृहजिल्लाका गठबन्धन दलबीच एमालेविरुद्ध तालमेल गर्ने निर्णय

डडेल्धुरा । प्रधानमन्त्री शेरबहादुर देउवाको गृहजिल्ला डडेलधुरामा सत्तारूढ दलहरूले स्थानीय तह निर्वाचनमा तालमेल गर्ने निर्णय गरेका छन् ।

आज बसेको बैठकले केन्द्रको निर्णयलाई स्वागत गरेका छन् ।

कांग्रेस जिल्ला उपसभापति दिल्लीराज जोशीको नेतृत्वमा बसेको बैठकमा माओवादी केन्द्र र नेकपा एकीकृत समाजवादीका जिल्लास्तरका नेताहरू सहभागी थिए ।

बैठकले निरन्तर छलफल जारी राख्ने निर्णय पनि गरेको कांग्रेस डडेलधुराका सचिव हेमराज चटौतले बताए । उनले भने, ‘निर्वाचनसम्म गठबन्धनलाई प्रभाव पार्ने खालका कुनै पनि विचार अभिव्यक्तिसमेत कसैले अभिव्यक्त नगर्ने निर्णय पनि भएको छ ।’

नेकपा एसका नेता डा. तारा जोशीले केन्द्रमा भएको निर्णयको मर्मअनुसार जिल्लामा छलफल भएको बताए । छलफलमा निर्वाचनमा जिल्लास्तरमा तालमेल गर्ने र सोही अनुसार भद्र सहमति गरेर अगाडि बढ्ने निर्णय भएको उनले जानकारी दिए ।

कांग्रेस सभापति देउवाको गृहजिल्लामा कांग्रेसभित्र आन्तरिक विवाद पनि कायम छ ।

सोही विवादलाई ध्यान राखेर गठबन्धनमार्फत आफ्नो साख बचाउने कांग्रेसको दाउ देखिन्छ भने, कांग्रेससँग तालमेल गरेर आफूलाई स्थापित गर्न माओवादी केन्द्र र नेकपा एसले रणनीति बनाएका छन् ।