सुनिल थापाको टिप्पणी : हाम्रा चेलिबेटीहरु सांसदबाट असुरक्षित छन् (भिडिओ)

धनकुटा । पूर्वमन्त्री तथा नेपाली कांग्रेसका केन्द्रीय सदस्य सुनीलबहादुर थापाले चेलिबेटीहरु सेनाभन्दा सांसदबाट असुरक्षित रहेको टिप्पणी गरेका छन् । सांसदसँग चेलिबेटीहरुले होसियार रहनुपर्ने उनले सुझाव दिए ।

धनकुटाको छथर जोरपाटी गाउँपालिकामा आइतबार भएको कार्यक्रलाइ सम्बोधन गर्दै थापाले हालै एक एमाले सांसद बलात्कारको आरोपमा पक्राउ परेको प्रसंग कोट्याएका थिए ।

उनले भने, ‘यदि हाम्रा चेलिबेटीमाथि कसैले शंका गर्नुपर्छ भने त्यो हाम्रै सांसहरुबाट गर्नु पर्छ । सूदुरपश्चिममा एउटा एमाले सांसद हालसालै बलत्कार गरेको आरोपमा पक्राउ पर्नुभएको छ । यहीँ धनकुटामा पनि यस्ता उदाहरणहरु छन्, तर लुकाएर राखिएका छन् ।’

उनले थपे, ‘सेनाहरु आएर हाम्रा चेलिबेटीहरुमाथि कुनै पनि हातपात हुँदैन । बरु यहीँकै सांसदहरुबाट हामी होसियार हुनुपर्छ ।’

कार्यक्रममा बोल्दै थापाले जिल्लाका सबै सांसदले काठमाडौं, विराटनगर, धरान र इटहरीमा घर बनाएको उल्लेख गरे । यस्तो गर्न रोक्नुपर्ने उनले बताए । यसपालि एमालेलाई यस ठाउँबाट हटाउन नसकेको खण्डमा अझै १५/२० वर्ष पछाडि धकेलिनुपर्ने उनको आँकलन थियो ।

यस्तै, धनकुटामा शनिबार भएको एक आमसभालाई संबोधन गर्दै थापाले भने, ‘एमालेलाई चुनावमा जिताएर पठाए धनकुटालाई प्रदेश १ को राजधानी बनाउँछौं भने, तर मलाई अहिले अपसोच लागेको छ, एमाले अहिले कुन दुलोमा लुकेर बसेका छन् ।’

धनकुटाको छिन्ताङ घटनालाई अतिरञ्जित गरी सहिद परिवारलाई ३० वर्षदेखि एमालेले बन्धक बनाएको उनले आरोप लगाए ।
थापाले सांसदहरुलाइ प्रश्न गर्दै भने, ‘म सोध्न चाहन्छु माननियज्यूहरुलाई । उहाँहरुले वर्षको सात करोड रुपैँया विकासको कार्यक्रमको लागि पाउनुहुन्छ । आजसम्म ३५ करोड रुपैयाँ यो ठाउँबाट लिइसक्नु भएको छ । त्यो पैसाले के-के कार्यक्रम दिनुभयो धनकुटाका जनतालाई ? के-के विकास गर्नु भयो ?’

उनले धनकुटाका सातवटा पालिकामा ४०/५० करोड भ्रष्टाचार भएको दावी गरे ।

कोभिडको महामारीमा सूर्यबहादुर थापा ट्रष्टबाट हेलिकोप्टरमा स्वास्थ्य सामाग्री लिएर धनकुटा आउँदा सांसदले हेलिकोप्टर आउन नदिएको उनले गुनासो गरे ।

‘हेलिकोप्टर रोकियो, मलाई आउन दिएनन् र उनीहरुले सुनिल हिरो हुन्छ भने । मलाई हिरो हुनु छैन । धनकुटाका जनताप्रति मेरो खबरदारी छ तर मेरो ज्यान जोखिम छ । लाज लाग्न पर्ने यिनीहरुलाई । हामीले लुटेरा सांसद पठाएछौं ।’

थापाले गृहमन्त्री बालकृष्ण खाँडलाई भने, ‘हाम्रो यहाँका सांसद हुनुहुन्छ, नयाँ भवन देखियो कि उद्घाटन गरिहाल्नु हुन्छ । त्यो घर हो कि, अफिस हो कि, के हो त्यो ? कृपया गृहमन्त्रीज्यू, अधिराज्यभरि नयाँ भवन भयो कि उहाँलाइ सुचना दिनुस् ताकि उहाँले उद्घाटन गरेर आउनु हुन्छ ।’