निर्वाचन आचारसंहितामा कसैको असहमति छैनः उपसभापति खड्का

काठमाडौं । सत्तारूढ दल नेपाली कांग्रेसका उपसभापति पूर्णबहादुर खड्काले आसन्न स्थानीय तह निर्वाचनका लागि निर्वाचन आयोगले जारी गरेको आचारसंहितामा कसैको असहमति नरहेको बताएका छन् ।

निर्वाचन आयोगले आज गरेको आचारसंहितामाथि दलहरूको प्रतिबद्धता लिने कार्यक्रममा विवाद देखिएपनि अन्तमा सबै दल सहमत भएको उनले बताए ।

‘केही समस्या देखिएको थियो । पछि आयुक्तज्यूहरूले प्रष्ट्याएपछि कुरा क्लियर भएर सबै दलहरूले प्रतिवद्धतामा क्रमश: दस्तखत गरिराख्नुभएको छ । मैले कांग्रेसका तर्फबाट गरे,’ कार्यक्रमपछि बाहिरिएर पत्रकारसँग प्रतिक्रिया दिँदै उनले भने,‘हामीले निर्वाचन आयोगले सधैँ जारी गर्ने आचारसंहिता अक्षरसः पालना गर्छौं ।’

आयोगले आयोजना गरेको आजको कार्यक्रम परम्परागत निरन्तरता मात्र भएकाले कसैले पनि शंका गर्न नहुने उनले बताए ।