कर्णालीका संसदीय समितिमा कोरम पुग्नै छाड्यो

सुर्खेत । कर्णाली प्रदेशका संसदीय समितिमा कोरम पुग्न छोडेको छ । प्रदेशको सामाजिक विकास समितिमा रहेका विधेयकबारे छलफल गर्न बोलाइएको बैठकमा एमालेका सांसदहरु अनुपस्थित भइदिँदा बैठकै बस्न सकेन ।

केही दिनअघि बोलाइएको वैठकमा अध्यक्ष देवी ओली, माओवादी केन्द्रका नेता नरेश भण्डारी, भूमि व्यवस्था कृषि तथा सहकारी मन्त्री चन्द्रबहादुर शाहीको मात्रै उपस्थिति रहेको थियो । समितिको बैठक बस्न कम्तिमा पाँचजना सांसदको उपस्थिति अनिवार्य हुन्छ ।

‘कर्णाली प्रदेश सहकारी ऐन, २०७५ लाई पहिलो संशोधन गर्न बनेको विधेयक, २०७७ उपर छलफल गर्ने प्रयोजनका लागि आयोजित बैठकमा समितिका सदस्यको अनुपस्थितिका कारण गणपुरक संख्या नपुगेर कर्णाली प्रदेशसभाअन्तर्गत सामाजिक विकास समितिको बैठक तेश्रो पटक स्थगित भएको छ’, समितिका सदस्य भण्डारी भन्छन्, ‘अन्य महत्वपूर्ण विधेयकहरु पनि समितिमा थन्किएका छन् ।’