चन्द्रागिरीका वडाध्यक्ष राउतको मेयरमा दाबी, भन्छन्- म नगरपालिकालाई पनि वडा जस्तै देशकै नमूना बनाउँछु (भिडिओसहित)

काठमाडौं । संघीयता कार्यान्वयनपछि भएको पहिलो स्थानीय तह निर्वाचनबाट चुनिएका जनप्रतिनिधिको समयावधि सकिँदैछ । र, दोस्रो कार्यकालका लागि वैशाखमा चुनावको मिति तोकिएको छ । कतिपय जनप्रतिधिले दोहोर्याउन चाहिरहेका छन् भने कतिले पदोन्नतिका लागि प्रयास गरिरहेका छन् ।

पहिलो कार्यकाल अधिकांश जनप्रतिनिधिका लागि आलोचित बन्यो । पहिलो अभ्यास भएकाले धेरैलाई सिक्न नै समय लाग्यो । कानूनसँगै कार्यालयलगायत भौतिक संरचना र सिस्टमको अभावका कारण कतिपयले चाहेर पनि उल्लेख्य काम गर्न सकेनन् । तर काठमाडौंको चन्द्रागिरी नगरपालिका– १५ का वडा अध्यक्ष उत्तमबहादुर राउतले भने अनेक अफ्ठेराबीच पनि निकै उल्लेख्य र उदाहरणीय काम गरे ।

नेकपा एमालेबाट वडा अध्यक्ष जितेका राउतको कामबाट प्रभावित भएर अध्यक्ष केपी शर्मा ओलीले समेत उनलाई टेलिफोन गरेर आभार प्रकट गरेको सन्दर्भ एकताका निकै चर्चामा थियो । अहोरात्र नागरिक सेवा खटिएका वडाध्यक्ष राउत आफ्नो क्षेत्रमा निकै लोकप्रिय छन् ।

आफ्नो वडामा निकै उदाहरणीय काम गरेका राउत आगामी स्थानीय तह निर्वाचनमा एमालेका तर्फबाट चन्द्रागिरीको मेयरमा चुनाव लड्ने तयारी गरिरहेका छन् । उनी आफूले टिकट पाउने र जित्नेमा पनि ढुक्क छन् ।

वडामा गरेको विकास मोडलकै आधारमा नगरपालिकालाई नै सुन्दर र समृद्ध बनाउने उनको योजना छ । पहिलो पाँचवर्षे कार्यकालमा सिकेका कुरालाई व्यवहारतः थप प्रयोग गर्न पनि आफू नगरपालिकाको मेयर हुनपर्ने उनको बुझाइ छ ।

देशका अरु स्थानीय तहलाई पनि शिक्षा हुने गरी काम गर्ने योजना बनाइरहेका राउत भन्छन्– म वडासँगै सिंगो नगरपालिकालाई देशकै नमून बनाउन सक्छु । त्यसका लागि मलाई मौका चाहिएको छ । र मलाई विश्वास छ, पार्टीले मलाई टिकट दिन्छ । अनि शानदार ढंगमा चुनाव जितेर जनताको सेवामा काम गर्छु ।

राउतले सहरी योजना र पुरातत्व विषयमा स्नातकोत्तर र वास्तुकलामा स्नातक गरेका छन् । उनी साँस्कृतिक, प्राकृतिक सम्पदा संरक्षरण गर्दै सहरी विकास योजनाका विज्ञ मानिन्छन् ।

यसरी चन्द्रागिरीको मेयरमा दाबी गरिरहेका राउतले वडा अध्यक्ष भएर पाँच वर्षमा के–के गरे ? उनकै शब्दमा–

चन्द्रागिरी नगरपालिका– १५ नम्बर वडा अत्यन्त तीव्र सहरीकरणको सूचीमा थियो, छ । हामी निर्वाचित हुनासाथ थप विकासको प्रष्ट रणनीति बनाएर योजनाबद्ध ढंगमा अघि बढ्यौं ।

सडक निर्माणलाई मुख्य प्राथमिकता दिएर हामीले काम तीव्र पार्यौं । जनताँग खाएको कसम पूरा गर्नु नै मेरो मुख्य जिम्मेवारी थियो । जसका लागि व्यापक काम गरेको अनुभव मसँग छ ।

उदाहरणका लागि घर बाहिर निस्किँदा लगाएको सफा जुत्ता घर फर्किदा पनि सफा रहोस् भन्ने उद्देश्यका साथ सक्दो छिटो हरेक सडक पिच र ढालान गर्नेतर्फ लाग्यौं । हामी आउँदा केन्द्रीय राजमार्गअन्तरगतको कलंकी–नागढुंगा सडक अलपत्र अवस्थामा थियो । हामीले त्यसलाई विस्तार गर्यौं, सफार चिटिक्कको बनायौं । यो हामीले गरेको महत्वपूर्णमध्येको एउटा काम हो ।

हामीले हाम्रो वडामै मन्त्रीलाई समेत बोलाएर सडक विकास गर्ने भन्नेबारे छलफल गर्यौं । र, छलफलबाट आएको निष्कर्षअनुसार काम गर्यों । परिणामः सडक सुन्दर र सफा भयो ।

हाम्रो वडामा दुई किलोमिटर बल्खु करिडोर निर्माण भइसकेको छ । तीनछाना मच्छे गाउँ सडकको निरन्तर गुणस्तर सुधार भइरहेको छ । यहीं वडामा पृथ्वीनारायण शाहले नेपाल एकीकरण गरेको समयमा निर्माण भएको गडी डाँडा वरिपरी अप्पर रिङरोड र तल्लोपट्टि लोवर रिङरोड निर्माण गरेका छौं ।

त्यस्तै खानेपानीको क्षेत्रमा पनि हामीले व्यापक सुधारको काम गरेका छौं । अहिले प्रत्येक घरमा धारा पुगेको छ । अहिलेसम्म हामीले १६ सय धारा स्थानीयलाई वितरण गरिसकेका छौं ।

हेनुहोस् भिडिओ

हामीले सामुदायिक किरियापुत्री भवन पनि निर्माण गरेका छौं । वातावरणीय क्षेत्रको कुरा गर्दा कीर्तिपुर र हाम्रो सीमानामा भएको भिराडिलमा एउटा पार्क निर्माण गर्दैछौं । अहिले उक्त पार्कमा हरेक शनिबार ३–४ हजार मानिस घुम्न आउने गरेका छन् ।

त्यस्तै सफा टोल कार्यक्रमअन्तरगत वृक्षरोपणलगायत थुप्रै कार्यक्रम गरेकाछौं ।

स्वास्थ क्षेत्रमा जेष्ठ नागरिक घरदैलो कार्यक्रम गर्यौं । घर–घर पुगेर रक्तचाम नाप्ने मेसिन र औषधि वितरण गर्यौं ।

शिक्षाको क्षेत्रमा विष्णुदेवी माध्यमिक विद्यालयलाई अत्याधुनिक बनाउँदैछौं । पुनर्निर्माण प्राधिकरणमा पत्राचार गरेर ९ करोडको लागतमा अत्याधुनिक भवन बन्दैछ ।

खेलकुदको क्षेत्रमा हामीले युवालाई विभिन्न खेल खेल्नका लागि अनुदान दिएका छौं । विभिन्न क्षेत्रमा महिला पुरुषका लागि छुट्टाछुट्टै इनडोर जिम स्थापना गरेका छौं । तीन ठाउँमा आउटडोर जिम स्थापना गरेका छौं ।

महिलालाई विभिन्न उद्यमशील तालिम संचालन गर्दै आएका छौं ।

कृषि क्षेत्रमा कौसी तरकारी खेतीलाई अगाडि बढाएका छौं । अहिले हरेक वडाका तीन सय घरमा कौसीखेती भइरहेको छ । यहाँका स्थानीयले तरकारी किनेर खान परेको छैन, उहाँहरुले तरकारी बेचेर आम्दानीसमेत गरिरहनु भएको छ ।

कोरोना कहरका बेला हामीले रोजगारमूलक कार्यक्रम सञ्चालन गर्यौं, जसबाट धेरै स्थानीय लाभान्वित भए ।

हामी आउनुअगाडि २२ लाख राजस्व उठ्ने यो वडामा अहिले २ करोड ३० लाख उठ्ने अवस्था बनाएका छौं । यो १० गुणा वृद्धि भनेको एउटा उल्लेखनीय हो । हाम्रो वडा राजस्व र बजेट परिचालनमा देशकै नम्बर एक भएको छ ।

जग्गाको अव्यवस्थित प्लटिङलाई व्यवस्थित गरेका छौं । सार्वजनिक जग्गा हडप्नेलाई परास्त गर्दै सरकारी स्वामित्वमा ल्याएका छौं । जुन काम गर्दा हामीले मुद्दाको समेत सामना गर्नुपर्यो ।

समग्रमा हामीले यहाँको विकास र नागरिकको खुसीका लागि व्यापक काम गरेका छौं, जुन दृश्यमा देखिन्छ । र नागरिकले अनुभूत गरेका छन् ।

अहिले जसरी वडामा एउटा सत्प्रयास गरियो, त्यसैगरी नगरपालिकालाई पनि समृद्ध बनाउने योजना मसँग छ । त्यसैले मलाई पार्टीले मेयरको टिकट दिन्छ र चुनाव जित्छु भन्ने विश्वास छ ।