चुनावी घोषणापत्रका लागि कांग्रेसले टोल फ्रीमार्फत जनताको सुझाव लिने

काठमाडौं । नेपाली कांग्रेसले स्थानीय निर्वाचनका लागि पार्टीले बनाउनुपर्ने घोषणापत्रमा समेट्नुपर्ने विषयमा टोल फ्री नम्बरबाट सुझाव लिने भएको छ । महामन्त्री गगन थापा संयोजकत्वको घोषणापत्र तयारी समितिको बैठकले पार्टीको घोषणापत्रमा जनताका सुझाव र अपेक्षा समेट्न टोल फ्री नम्बर र सामाजिक सञ्जालबाट सुझाव लिने निर्णय गरेको हो ।

कांग्रेस केन्द्रीय सदस्य अजयबाबु शिवाकोटीका अनुसार स्थानयि निर्वाचनको सन्दर्भमा कांग्रेसको केन्द्रीय घोषणा पत्र लोकतन्त्र दिवसको अवसर पारेर आगामि बैशाख ११ गते सार्वजनिक गरिनेछ । घोषणापत्र निर्माणका क्रममा अघिल्लो निर्वाचनको घोषणापत्र अनुसार काम भए नभएको विषयमा आन्तरिक समिक्षा समेत गरिने केन्द्रीय सदस्य शिवाकोटीले बताए ।

कांग्रेसले देशभरका स्थानीय तहको स्थानीय आवश्यकता अनुसार स्थानीयस्तरमा प्रतिवद्धता समेत जारी गर्नेछ । ‘केन्द्रीयस्तरमा कांग्रेसले घोषणापत्र बनाउनेछ भने हरेक स्थानीय तहमा स्थानीय प्रतिवद्धतापत्र सार्वजनिक हुनेछ’, केन्द्रीय सदस्य शिवाकोटीले भने । घोषणा पत्र निर्माणका क्रममा कृषि, स्वास्थ्य, शिक्षा, पर्यटन, उद्यम लगायतका क्षेत्रका सरोकारवाला एवं विज्ञसँग पर्याप्त छलफल गरेर राय लिने निर्णयसमेत घोषणा पत्र तयारी समितिले गरेको छ ।