भयरहित वातावरणमा स्थानीय तहको निर्वाचन हुने गृहमन्त्री खाँणको दाबी

रुपन्देही । गृहमन्त्री बालकृष्ण खाँणले भयरहित वातावरणमा तोकिएकै समयमा स्थानीय तहको निर्वाचन हुने दाबी गरेका छन् । गुल्मी उद्योग बाणिज्य संघले आयोजना गरेको चौथो गुल्मी महोत्सवको उद्घाटन गर्दै मन्त्री खाँणले तोकिएकै समयमा बैशाख ३० गते स्थानीय तहको निर्वाचन हुने बताएका हुन् ।

उनले निर्वाचनलाई भयरहित वातावरणमा सम्पन्न गर्नका लागि सरकार प्रतिबद्ध रहेको बताए । निर्वाचनलाई स्वच्छ र भयरहित वातावरणमा सम्पन्न गर्नका लागि सरकार प्रतिबद्ध रहेको भन्दै ढुक्क भएर मतदानमा सहभागी हुन सबै नागरिकलाई आग्रह पनि गरेका छन् ।

उद्योग वाणिज्य संघ गुल्मीको आयोजनामा ‘गुल्मी जिल्लाको सम्पन्नता र समृद्धिको निकास शिक्षा, स्वास्थ्य, कृषि र पर्यटनमा आधारित व्यापारको विकास’ भन्ने नाराका साथ शुक्रबारबाट सुरु भएको महोत्सव बैशाख ४ गतेसम्म चल्नेछ । उद्घाटनको अवसरमा सदरमुकाम तम्घासस्थित बिभिन्न संघ संस्थाले बिभिन्न झाँकी लगायत र्याली प्रस्तुत गरेका थिए ।

महोत्सवमा विभिन्न औद्योगिक क्षेत्रबाट उत्पादित सामग्रीसँगै गुल्मी जिल्लामा विभिन्न जाति विशेष रहेका खानाका परिकार, विभिन्न सँस्कृति झल्कने झाँकी महोत्सव अवधिभर प्रदर्शन गरिएको छ ।