पाल्पामा पनि विप्लव नेतृत्वको नेकपा निर्वाचनमा, तिनाउमा जिसीको उम्मेदवारी घोषणा

रुपन्देही । पाल्पा जिल्लाको तिनाउ गाउँपालिकामा नेत्र विक्रम चन्द विप्लवले नेतृत्व गरेको नेपाल कम्युनिस्ट पार्टीले निर्वाचन लड्ने भएको छ ।

सो पालिकामा पार्टीका जिल्ला कमिटी निवर्तमान सचिव भुवन जिसीले अध्यक्षमा आफ्नो उम्मेदवारी घोषणा गरेका छन् । पार्टीले निर्वाचन नजाने नीति लिएको भए पनि जिसीले आफ्नो टिमसहित स्वतन्त्र उम्मेदवारी घोषणा गरेका हुन् ।

आफू निकट नेताहरूको बैठकमा उनले पार्टीबाट राजीनामा दिनुपर्ने अवस्था आए पनि उम्मेदवारी दिने बताए ।

सो पार्टीले जिसीलाई पार्टी सचिवबाट हटाएर पूर्व लडाकु कमान्डर मीनबहादुर आलेलाई सचिवमा चयन गरेको थियो ।

उनी तत्कालीन नेपाली माओवादी जनयुद्धमा २०५८ सालमा बुटवल बहुमुखी क्याम्पसको अखिल (क्रान्तिकारी)बाट आबद्ध भएर राजनीतिमा आएका थिए ।

विप्लव समूहको राम्रो पकड रहेको तिनाउमा २ नम्बर वडाबाट टोपबहादुर विक, ३ नम्बर वडाबाट नीरबहादुर विक र ४ नम्बर वडाबाट गणेश रास्कोटी समेत वडाध्यक्षमा संयुक्त रूपमा स्वतन्त्र उम्मेदवारी घोषणा गरेका छन् ।

यस्तै १ र ६ नम्बर वडा अध्यक्षमा आकाङ्क्षीहरू बढेपछि छलफलमा रहेको सो पार्टीका नेताले जनाएका छन् ।

यस्तै अन्य वडाहरूमा समेत विप्लव नेतृत्वका नेताहरूले स्वतन्त्र ढङ्गले चुनावमा जाने निश्चित भएको छ ।