शशांक कोइरालालाई पत्र पठाउँदै निर्वाचन आयोगले भन्यो- सात भित्र जवाफ दिनू

काठमाडौं । निर्वाचन आयोगले नेपाली कांग्रेसका नेता डा‍ शशांक कोइरालालाई एक साता भित्र जवाफ पठाउन पत्राचार गरेको छ ।

कोइरालाले विभिन्न सञ्चारमाध्यममार्फत २०७४ सालको निर्वाचनमा ६ करोड रुपैयाँ आफूले खर्च गरेको भन्दै सार्वजनिक अभिव्यक्ति दिएकोप्रति ध्यानाकर्षण भएको जनाउँदै आयोगले कोइरालासँग जवाफ मागेको हो ।

आयोगले भनेको छ, ‘त्यस विषयमा के कसो भएको हो ? सात दिन भित्र आयोगमा जवाफ पठाउन ध्यानाकर्षण गराइएको छ ।’

आयोगकाअनुसार २०७४ सालको प्रतिनिधि सभाको निर्वाचनमा नवलपरासी बर्दघाट सुस्ता पूर्वको निर्वाचन क्षेत्र नम्बर एकबाट निर्वाचित उम्मेदवार कोइरालाले आयोगसमक्ष २१ लाख ७५ हजार रुपैयाँ खर्च भएको विवरण पेस गरेको पाइएको छ ।

आयोगका अनुसार आयोगले २०७४ सालमा सम्पन्न प्रतिनिधिसभा सदस्य पदको लागि उम्मेदवारले २५ लाख रुपैयाँसम्म खर्च गर्न सक्ने प्रावधान रहेको पनि स्मरण गराएको छ ।