झलनाथ भन्छन्- कम्तीमा एउटा महानगर र उपमहानगरपालिकामा नेकपा एसको दाबी

विराटनगर । नेकपा एकीकृत समाजवादीले कम्तीमा एउटा महानगर र एउटा उपमहानगरपालिकामा नेतृत्व दाबी गर्ने भएको छ ।
नेकपा एसका सम्मानित नेता झलनाथ खनालले विराटनगर विमानस्थलमा पत्रकारसँग कुरा गर्दै यसबारे छलफल भइरहेको बताए ।

खनालले महानगर तथा उपमहानगरमा सत्तारुढ गठबन्धनले माथिबाटै उमेदवारको टुंगो लगाउने बताए ।

मुलुकका विभिन्न महानगर र उपमहानगरमा कांग्रेसले उमेदवारहरूको छनोट गरिरहेका बेला नेता खनालले दुवै स्थानीय तहको उम्मेदवार केन्द्रले टुंग्याउने बताएका हुन् ।

खनालले भने,‘महानगर र उपमहानगरको हकमा उम्मेवारको टुंगो केन्द्रबाटै गर्ने सहमति भएको छ। नगरपालिका र वडामा आवश्यताको आधारमा तालमेल स्थानीयस्तरबाट हुनेछन् ।

नेता खनालले आगामी स्थानीय तहको चुनावमा ५ महानगरपालिकामध्ये एक महानगर र एक उपमहानगरमा नेकपा एसको दाबी रहने समेत बताए ।