कपिलवस्तुका सबै ठाउँमा एमालेबाट वडासम्मको उम्मेदवार सिफारिस, विजयनगरमा सर्वसम्मत

रुपन्देही । नेकपा एमाले कपिलवस्तुले जिल्लाका १० वटै पालिकाबाट मेयर उपमेयर र वडाका अध्यक्ष एवं सदस्यको उम्मेदवारी सिफारिस गरेको छ ।

जिल्लामा एमालेको पकड मानिएका बाणगंगा, विजयनगर, कपिलवस्तु नगरपालिका, शिवराज नगरपालिकादेखि प्रभाव कम भएका अन्य पालिकासमेतबाट मेयर उपमेयरमा कम्तीमा ३ देखि बढीमा ११ जना सम्मको नाम सिफारिस भएको हो ।

एमालेका केन्द्रीय सदस्य एवम् कपिलवस्तु इन्चार्ज बलराम अधिकारीले धेरै आकांक्षी देखिनु राम्रो भएको र धेरै आफूले पाएपनि नपाएपनि सन्तुष्ट रहने बताएकाले सहज भएको दाबी गरे ।

१० वटै पालिकाबाट सिफारिस भएका उम्मेदवारमध्ये वडाध्यक्षसम्मको जिल्ला कमिटीले बुधबारभित्र टुंगो लगाउने छ भने मेयर उपमेयरको जिल्लाले सिफारिस गरी प्रदेश कमिटीसमक्ष पठाउने छ ।

को को परे सिफारिसमा ?

बणगंगाबाट मेयरमा ६ जना सिफारिसमा परेकोमा पार्टीको प्रदेश कमिटीमा रहेका धेरै नेता रहेका छन् । जसअनुसार प्रदेश नेता एवं कपिलवस्तुका पूर्वअध्यक्ष झविलाल पोखरेल, कृष्ण पौडेल, चक्रपाणी अर्याल, जंजिर थारु, सूर्यकुमारी शाही सिफारिस भएका छन् । ती सबै प्रदेश कमिटीका सदस्य हुन् । जिल्ला स्तरको नेतामा विश्वको कार्की मात्र सिफारिसमा परेका छन् ।

एमालेका अधिकांश केन्द्रीय र प्रदेश नेता बाणगंगामा रहेकाले यहाँको मेयरमा आन्तरिक प्रतिस्पर्धा गर्ने पनि जिल्लाभन्दा माथिल्लो कमिटीका नेता नै हुनु स्वभाविक रहेको एमाले जिल्ला अध्यक्ष डम्मर शर्माले बताए ।

शिवराज नगरपालिकामा मेयरमा अर्जुन केसी, महादेव पोख्रेल, र लोकेन्द्र पौडेलको नाम सिफारिस भएका छन् भने उपमेयरमा अहिलेकै उपमेयर शिवकुमारी थारु सिफारिस भएकी छन् ।

विजयनगरमा सर्वसम्मत

विजयनगर गाउँपालिकाको अध्यक्षमा गोपाल थापा र उपाध्यक्षमा लक्ष्मी थारुको नाम सर्वसम्मत सिफारिस गरिएको छ ।

थापा नेकपा एमाले कपिलवस्तु सचिवालय सदस्य तथा विजनगर इन्चार्ज र चौधरी जिल्ला कमिटी सदस्य हुन् । दुवैजना गत चुनावमा नेकपा एमालेबाट अध्यक्ष र उपाध्यक्षमा निर्वाचित भएका थिए ।

बुद्धभूमि नगरपालिबाट ६ जना मेयरका लागि सिफारिस भएका छन् । टेकराज पौडेल, रुपेश श्रेष्ठ, कृष्णप्रसाद भट्टराई, पिताम्बर खनाल, मिनराज बेल्वासे र राजेन्द्र सुवेदी मेयरका लागि सिफारिस भएका हुन् ।