कांग्रेसको चुनावी सभा २ घण्टाभन्दा बढी नहुने, गठबन्धनका नेतालाई आसनग्रहण गराउनुपर्ने

काठमाडौं । नेपाली कांग्रेसले स्थानीय तहको निर्वाचनको प्रचारका लागि २ घण्टाभन्दा लामो चुनावी सभा नगर्ने भएको छ । कांग्रेसको केन्द्रीय निर्वाचन परिचालन समितिको शुक्रबारको बैठकले निर्वाचनको प्रचारका लागि आयोजना गरिने सभाहरू सञ्चालन गर्न मापदण्ड तय गरेको हो ।

समितिले बनाएको मापदण्डअनुसार पालिकास्तरका चुनावी सभा बढीमा २ घण्टाभित्र सकिनुपर्नेछ । वडा र टोलस्तरका सभा भने १ घण्टाभित्रै सम्पन्न गर्नुपर्ने मापदण्डमा उल्लेख छ । बैठकले सभामा आसन ग्रहण र वक्ताको संख्याबारे पनि मापदण्ड निर्धारण गरेको छ ।

गठबन्धन भएको स्थानमा गठबन्धनमा रहेका दलको तर्फबाट १-१ जना, सम्बन्धित सभाको सभापति र प्रमुख अतिथि वा प्रमुख वक्तालाई मात्रै आसन ग्रहण गराइनेछ । अन्य जिम्मेवारीमा रहने नेताहरुलाई सामूहिक आसन ग्रहण गराउनुपर्ने मापदण्डमा उल्लेख छ । बैठकले चुनावी सभाका र प्रचारका लागि समय व्यवस्थित गर्न मापदण्ड बनाएको हो ।

त्यस्तै बैठकले प्रदेश र जिल्लामा केन्द्रीय प्रतिनिधि खटाउने, पालिकासम्मको प्रतिनिधि प्रदेश समितिले पठाउने र भ्रातृ एवं शुभेच्छुक संस्थाहरुले आ-आफ्नै परिचालन समिति बनाउने निर्णयसमेत गरेको छ ।