पोखरा महानगरपालिकाको मेयर बन्न कांग्रेसका १८ जनाको दाबेदारी पेश

पोखरा । देशका ६ वटा महानगरपालिकामध्ये पोखराको मेयर नेकपा एसले पाउने चर्चा चलिरहेका बेला नेपाली कांग्रेसबाट मात्रै १८ जनाले मेयरको दाबी गर्दै महानगर समितिमा निवेदन दिएका छन् ।

१५ हजार रुपैयाँसहित उम्मेदवारीको लागि दाबेदारी पेश गर्नेमा गण्डकी प्रदेश सरकारका मन्त्री बिन्दुकुमार थापादेखि पूर्व सचिव तथा अख्तियार प्रमुख सिफारिस भएर पनि नियुक्ति हुन नपाएका बाबुराम आचार्यसम्म छन् ।

पोखराको मेयरका लागि कांग्रेसका कास्की जिल्ला सभापति किशोरदत्त बराल, पत्रकार गंगाधर पराजुली, यसअघि उपमेयरमा पराजित सरस्वती गुरुङ लगायत १८ जना छन् ।

त्यस्तै उपमेयरका लागि ११ जनाको आबेदन परेको छ ।

उपमेयरमा दाबी गर्नेहरुमा माया बराल कार्की क्षेत्री, लक्ष्मी पाण्डे क्षेत्री, रंगिला आचार्य, आनन्दी राणा कार्की, टिकाकुमारी गुरुङ र दिपक मल्ल छन् ।

त्यस्तै मिलन थापा, चिनु गुरुङ, शिव केसी र गोविन्द नेपालीले पनि उपप्रमुखका लागि आवेदन दिएका छन् ।