इटहरीको मेयर समाजवादीलाई दिए कांग्रेसमा विद्रोह हुने

सुनसरी । नेपाली कांग्रेस सुनसरीका नेताहरूले इटहरी उपमहानगरपालिकामा नेकपा एकीकृत समाजवादीलाई मेयर नछाड्न पार्टी नेतृत्वसँग माग गरेका छन् । इटहरी उपमहानगरको प्रमुख कांग्रेसले नै पाउनुपर्ने भन्दै उनीहरुले विद्रोहको चेतावनी समेत दिएका छन् ।

इटहरीको मेयरमा अघिल्लो स्थानीय निर्वाचनमा नेकपा एमालेका द्वारिकलाल चौधरी निर्वाचित भएका थिए । नेकपा एकीकृत समाजवादीले सुनसरीमा आफ्नो संगठन सुदृढ रहेको भन्दै मेयरमा दावी गरेको छ । सत्तारुढ दलहरुबीच आइतबार अबेर तयार भएको सम्भावित सहमतिको ड्राफ्टमा इटहरीको मेयर समाजवादी र उपमेयर कांग्रेसले पाउने उल्लेख छ ।

सुनसरी कांग्रेसका नेताहरूले भने इटहरीमा कांग्रेसले मेयर नपाए गठबन्धन टुट्ने चेतावनी दिएका छन् । कांग्रेसका स्थानीय नेता धनबहादुर पुरीले गठबन्धन गर्दा कांग्रेसले इटहरीको मेयर नपाए स्वतन्त्र उम्मेदवार बन्ने घोषणा गरेका छन् ।

‘इटहरीमा कांग्रेसको भोट थपेर अर्को पार्टीको उम्मेदवारलाई मेयर बनाउन गार्हो छ । यतिबेला कांग्रेसले एक्लैपनि जित्ने अवस्था रहेकोले अरुलाई छाड्ने निर्णय केन्द्रले गरेपनि हामीलाई मान्य हुँदैन’, पुरीले नेपाल प्रेससँग भने ।

उनल इटहरीमा मेयर नपाए कांग्रेसबाट सशक्त विद्रोह हुने चेतावनी पनि दिए ।