कांग्रेसले इटहरीमा मेयर नपाउने चर्चाले आकस्मिक रुपमै भयो गीत लोकार्पण (भिडिओ)

इटहरी । सोमबार मात्रै नेपाली कांग्रेस इटहरीको चुनावी गीतको सम्पुर्ण काम सकिएको थियो। हप्तौं लगाएर इटहरी कांग्रेस सचिव विक्रम घिमिरे र नेपाली कांग्रेसका शुभेच्छुक निमेष घिमिरेले तयार गरेको गीतको लोकार्पण इटहरी कांग्रेसका हस्तीहरु ल्याएर गर्ने तयारी थियो।

लोकार्पणमा इटहरीकै बासिन्दा नेपाली कांग्रेस केन्द्रिय सदस्य राजिब ढुङ्गानादेखि मेयरका तीन प्रत्यासी हेमकर्ण पौडेल, रोहित प्रसाईं र भिम पौडेल लगायतका नेताकार्यकर्ता ल्याउने तयारी थियो । तर सोमबार एकाएक हतारोमा भयो। इटहरी ६ को होटल इनटुरिष्टमा साँझ साढे पाँच बजे गीत र भिडियो पत्रकार सम्मेलनमार्फत सार्वजनिक गरियो।

‘भबय कार्यक्रम गरेर लोकार्पणको तयारी थियो तर हतारोमा गर्नुपर्यो’ गीतकार विक्रम घिमिरेले भने ‘यस्तो हतारोको पनि राजनीतिक कारण छ।’

घिमिरेले भनेको राजनीतिक कारण इटहरीमा गठबन्धनको तर्फबाट नेपाली कांग्रेसले मेयर टिकट नपाएर नेकपा एसले पाउने चर्चा नै हो। सोमबार गठबन्धनको बैठकको त्यो चर्चाकै कारण हतारोमा गीत लोकार्पण गरिएको बताउँछन् अर्का गीत अभियानका सदस्य निमेष घिमिरे ।

उनी भन्छन्, ‘सिधा कुरा गर्दा कांग्रेस जिताउन बनाइएको चुनावी गीत हो। कांग्रेसले नै मेयर नपाउदा गाह्रो हुने भएकोले हतारमा सार्वजनिक गरिएको हो।’