कांग्रेसलाई कसैको बैशाखी चाहिँदैन : डा. कोइराला

काठमाडौं । नेपाली कांग्रेसका नेता डा. शेखर कोइरालाले कांग्रेसलाई कसैको बैशाखी जरुरी नभएको बताएका छन् ।

नेपाल विद्यार्थी संघको स्थापना दिवसका अवसरमा आयोजित कार्यक्रममा बोल्दै नेता कोइरालाले कांग्रेसलाई गन्तव्यमा पुग्नका लागि कम्युनिस्टको सहारा नचाहिने बताए ।

‘मलाई लाग्दैन नेपाली कांग्रेस कमजोर छ । एक्लै लडे पनि हामी हाम्रो गन्तव्यमा पुग्नसक्छौं भन्ने आत्मविश्वास छ । कांग्रेसलाई कसैको बैशाखी चाहिएको छैन’, कोइरालाले भने ।

नेता कोइरालाले कांग्रेसको केन्द्रीय समितिको निर्णय विपरीत गठबन्धनको नाममा तालमेलको निर्णय भएको भन्दै उपयुक्त समयमा कदम चाल्ने बताए ।

‘सबै कुराको लेखाजोखा निर्वाचनपछि गरौला । अहिले कांग्रेसका उम्मेदवार जिताउन हामी सबै लाग्नुपर्छ’, कोइरालाले भने ।

कोइरालाले भ्रातृ संस्थाको तदर्थ समिति गठनमा नेतृत्वले गरेका कमजोरी सच्याउन पहल गर्ने बताए ।