सुनकोशी कांग्रेस: मतदानबाट उम्मेदवार सिफारिस, कसले ल्याउला टिकट ?

सिन्धुपाल्चोक । नेपाली कांग्रेस सुनकोशी गाउँपालिका कार्य समितिले स्थानीय निर्वाचनमा गाउँपालिका अध्यक्ष र उपाध्यक्षको उम्मेदवार मतदानबाट छनोट गरेको छ । सर्वसम्मत हुन नसकेपछि मतदानबाट उमेदवार छनोट गरेर जिल्ला समितिमा पठाइने कांग्रेसले जानकारी दिएको छ ।

मतदानबाट गाउँपालिका समितिका सभापतिसमेत रहेका रुपकाजी लामाले २७ र नेत्रबहादुर कार्कीले १७ मत ल्याएका थिए । अध्यक्षका लागि सातजनाको उमेदवारी परे पनि बढी मत पाउने लामा र कार्कीलाई जिल्ला समितिमा सिफारिस गर्ने कांग्रेसले जानकारी दिएको छ । त्यस्तै उपाध्यक्षमा सिफारिसका लागि पनि मतदान भएको छ ।

उपाध्यक्षमा कान्छिमाया तामाङले २०, ज्ञानु तिमिल्सिनाले १८ र अम्बिका तिमिल्सिनाले १६ मत ल्याएका थिए । बढी मत ल्याउने तीनैजनाको नाम जिल्ला समितिमा सिफारिस गरिने नेपाली कांग्रेस सुनकोशी गाउँपालिका समितिका सभापति रुपकाजी लामाले जानकारी दिए ।

गाउँपालिका समितिमा रहेका ४२ मध्ये ४१ जना सहभागी भएकोमा २९ जना मतदान प्रक्रियामा सहभागी भएका थिए । १२ जनाले निर्वाचन प्रक्रियामा सहभागी नहुने भन्दै निर्वाचन बहिष्कार गरेको सभापति लामाले जानकारी दिए ।

लोकतान्त्रिक अभ्यासबाट गाउँपालिका समितिबाट उम्मेदवार छनोट भएको र यही नाम अब जिल्ला समितिमा पठाइने लामाले जानकारी दिए । गाउँ समितिले पठाएको नाम नै जिल्ला समितिले छनोट गर्नेमा आफूहरु विश्वस्त रहेको लामाले बताए ।

गाउँपालिका अध्यक्षका लागि वर्तमान गाउँपालिका अध्यक्ष श्रवणकुमार जिसी(विनोद) आकांक्षी थिए । अब गाउँपालिका समितिबाट नै सिफारिस नभएपछि जिल्ला समितिले कसलाई उमेदवार बनाएर पठाउँछ भन्ने प्रश्न रोचक भएको एक नेताले बताए ।