भारत आइपुगे बेलायती प्रधानमन्त्री जाेन्सन

काठमाडौं । दुई दिने भ्रमणका लागि बेलायतका प्रधानमन्त्री बोरिस जोन्सन भारत आइपुगेका छन् । भारतीय सञ्चारमाध्यमहरुका अनुसार बिहीबार बिहान जोन्सन भारतको अहमदावाद आइपुगेका हुन् ।

गुजरातका मुख्यमन्त्री भूपेन्द्र पटेल र गभर्नर आचार्य देवव्रतले जोन्सनलाई विमानस्थलमा पुगेर स्वागत गरेका थिए । जोन्सनको भ्रमणका क्रममा  भारत र बेलायतबीच रक्षा संयन्त्र सुधार र दुई देशको व्यापारिक रणनीतिलाई महत्वपूर्ण सम्झौता हुने अनुमान गरिएको छ ।

यस्तै बेलायत र भारतका सरकार प्रमुखहरुबीच युक्रेनमा जारी रुसी आक्रमणको विषयमा समेत छलफल हुने बताइएको छ । गुजरातबाट भारतकाे भ्रमण सुरु गरेका जोन्सनले भारतीय प्रधानमन्त्री नरेन्द्र मोदीसँग शुक्रबार भेट गर्ने तय भएको छ ।