प्रचण्डको दाबी- गिरिजा र मैले हस्ताक्षर गरेपछि नेपालमा ‘नयाँ युग’ सुरू भयो

काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले डेढ दशकअघिको स्मरण गर्दै नेपालमा शान्ति प्रक्रियापछि ‘नयाँ युग’ को सुरूवात भएको बताएका छन् । सशस्त्र द्वन्द्वकालमा सेना र माओवादी लडाकुबीच भीडन्त भएको कैलालीको मसुरिया पुगेर उनले यस्तो बताएका हुन् ।

‘सात राजनीतिक दलका तर्फबाट गिरिजाप्रसाद कोइराला र तत्कालीन नेकपा माओवादीका तर्फबाट मैले त्यसको अध्यक्षको हैसियतले मैले हस्ताक्षर गरेपछि नेपालमा नयाँ युगको सुरूवात भयो ‘गणतन्त्रको युग,’ उनले भने, ‘संघीयताका युग, समावेशी/समानुपातिकताको युग, विकेन्द्रीकरणको यौटा नयाँ प्रकृयाको युग, धर्मनिरपेक्षताको युग, सबै नेपालीलाई आत्मसम्मान र पहिचान दिने यौटा नयाँ युगको सुरूवात भयो ।’

यो युगको सुरूवात गर्न माओवादीले गरेको ‘जनयुद्ध’ सात दलले गरेको जनआन्दोलनको ठूलो भूमिका रहेको उनले बताए ।