एमालेको घोषणापत्र : आर्थिक वृद्धि, रोजगारी सिर्जना र निजी क्षेत्रमा यस्ता छन् एजेण्डा

काठमाडौं । नेकपा एमालेले स्थानीय तहको चुनावका लागि पार्टीको केन्द्रीय घोषणापत्र सार्वजनिक गरेको छ । सार्वजनिक गरिएको घोषणापत्रमा देशको समग्र विषयवस्तु समेटिएको छ । आर्थिक रुपमा देशलाई कसरी माथि उठाउने भनेर पनि एमालेले आफ्नो घोषणापत्रमा धेरै विषयवस्तु उल्लेख गरेको छ ।

घोषणापत्रको पृष्ठ ३३–३५ मा औद्योगीकरण र आर्थिक वृद्धिको विषय समेटिएको छ । अन्य पृष्ठमा समेत कसरी आर्थिक वृद्धि गर्ने, रोजगारी सिर्जना गर्ने र देशको व्यापार घाटा कम गर्ने भन्ने विषय उल्लेख छ ।

सार्वजनिक, निजी र सहकारी माध्यमद्वारा औद्योगीकरण गर्दै उत्पादन वृद्धि, रोजगारी सिर्जना, गरिबी निवारण र आत्मनिर्भर अर्थतन्त्रको निर्माणको कुरा घोषणापत्रमा समेटिएको छ । साथै एमालेले सामाजिक सुरक्षा कार्यक्रममार्फत् श्रमिकको हक र संरक्षण गर्ने घोषणापत्रमा समेटेको छ ।

प्रत्येक प्रदेशमा कम्तीमा एउटा औद्योगिक क्षेत्र स्थापना र सञ्चालन गर्ने भनिएको छ । प्रत्येक पालिकामा पनि कम्तीमा एउटा औद्योगिक ग्राम स्थापना गर्ने घोषणापत्रमा उल्लेख छ । खानी तथा खनिजजन्य पदार्थको उत्खनन्, संरक्षण र परिचालन गर्ने भनिएको छ ।

गाउँगाउँमा उत्पादन भएका वस्तुलाई बजारीकरण गर्ने र पालिकाका मुख्य आर्थिक केन्द्र र बजारलाई केन्द्रित गर्ने कुरा समेटिएको छ । नेपालमा उत्पादन भएका वस्तुले बजार नपाउने र भारतबाट तरकारीजन्य वस्तु आयात भएर देशको व्यापार घाटा वृद्धि हुने गरेको छ ।
उत्पादनसँग जोडिएका र श्रमसँग जोडिएका सबै श्रमिकलाई सामाजिक सुरक्षामा जोड्ने विषयवस्तु पनि समेटिएको छ ।

घोषणापत्रले उद्यमशीलता र रोजगारीलाई पनि समेटेको छ । सबै स्थानीय तहलाई उद्यमशीलता र रोजगारीसँग जोडेर समृद्धिको लागि सहकारी भनिएको छ । गाउँ–गाउँमा भएका उत्पादनलाई जोडेर देशको आर्थिक विकासमा सहयोग पुर्‍याउने विषय पनि घोषणापत्रमा समेटिएको छ ।  पर्यटन र पूर्वाधार विकास, स्थानीय उत्पादनको बजारीकरण, दक्ष जनशतिको उत्पादन, प्राविधिक शिक्षालगायतका विषयलाई घोषणाले समेटेको छ ।

केपी ओली नेतृत्वको सरकारले निजी क्षेत्रका समस्या समाधान गर्ने क्षेत्रमा काम गरिरहेका नेकपा एमालेका संसद मोतीलाल दुगडलाई उद्योग राज्यमन्त्रीसमेत बताएका थिए । दुगड मन्त्री भएका बेला उद्योग क्षेत्रका धेरै समस्या समाधान गरेको निजी क्षेत्रका व्यक्तिहरु नै बताउने गर्छन् ।

एमालेको नयाँ पार्टी कार्यालयबाट शुक्रबार जारी घोषणापत्रमा एमालेको सरकारका पालामा भएका केन्द्र र स्थानीय तहका कामहरुको उपलब्धि व्याख्या गरिएको छ । बाँकी कामका योजनासमेत घोषणापत्रमा समेटिएको छ । एमालेले ‘सुखी ज्येष्ठ नागरिक, खुसी बालबालिका’ देखि ‘जनप्रतिनिधि शासक होइन जनताका सेवक’ हुनेछन् जस्ता नाराहरू अघि सारेको छ ।