नुवाकोटमा भागबण्डा : दुई वटा पालिका कांग्रेसलाई, एउटा माओवादीलाई

काठमाडौं । नुवाकोट जिल्लामा सत्ता गठबन्धनका दलहरुबीच आगामी स्थानीय चुनावको उम्मेदवारीलाई लिएर भागबण्डा पूरा भएको छ ।

पाँच दिनसम्म बसेको जिल्ला गठबन्धन दल संयन्त्रको बैठकले आज भागबण्डा टुंग्याएको हो ।

माओवादी केन्द्रका संयोजक पुष्प लामिछाने र नेपाली कांग्रेसका जिल्ला सभापति रमेशकुमार महतले जारी गरेको विज्ञप्ति अनुसार जिल्लाका तीन पालिकाहरूमध्ये दुई वटामा कांग्रेस र एउटामा माओवादी केन्द्रले प्रमुखमा उम्मेदवारी दिनेछन् ।

विदुर नगरपालिका र तारकेश्वर गाउँपालिका कांग्रेसले पाएको छ भने बेल्कोटगढी नगरपालिका माओवादीको भागमा परेको छ ।

यस्तै, उपप्रमुखमा विदुर नगरपालिका र तारकेश्वर गाउँपालिकामा माओवादीका उम्मेदवार उठ्नेछन् भने बेल्कोटढीमा कांग्रेसका उम्मेदवार उठ्ने निधो भएको छ ।

विदुर नगरपालिकामा ९ वटा वडाध्यक्ष कांग्रेस, ३ वटा माओवादी र एउटा एकीकृत समाजवादीले पाएको छ ।

यस्तै बेल्कोटगढीमा ७ वटा वडामा नेपाली कांग्रेस, ५ वटामा नेकपा माओवादी र २ वटामा नेकपा एकीकृत समाजवादीका उम्मेदवार अध्यक्षमा उठ्ने छन् ।

तारकेश्वरमा कांग्रेसले ४ र माओवादीले २ वटा वडाध्यक्ष पाएको छन् ।