कैलालीमा जनमोर्चाका दुई विकल्प : सहमतिमा ६ वडाध्यक्ष नत्र प्रमुख उपप्रमुखमै उम्मेदवारी

कैलाली । निर्वाचन आयोगले स्थानीय तह निर्वाचनका लागि उम्मेदवारी दर्ता गर्ने समय भोलि र पर्सि तोकेको छ । तर, कैलालीमा आज सम्म पनि गठबन्धनका दलहरू बिच भागबन्डा मिल्न सकेको छैन ।

सत्ता गठबन्धन भित्रै रहेको जनमोर्चाले पनि कैलालीमा दुई वटा विकल्पमा आन्तरिक तयारी गरिरहेको छ ।

अहिले जनमोर्चाले कैलालीका १३ स्थानीय तह मध्ये कुनै पनि स्थानीय तहमा प्रमुख वा उपप्रमुखमा दाबी गरेको छैन ।

सहमतिको आधारमा जनमोर्चाले कैलालीका १२६ वडा मध्ये ६ वटा वडाध्यक्ष मागेको छ ।

गोदावरीको १२ र १ धनगढीको १३, घोडाघोडीको १०, लम्कीचुहाको ८ र जानकीको ५ नम्बर वडामा वडाध्यक्षको दाबी गरेको जनमोर्चाका केन्द्रीय सदस्य तथा सुदूरपश्चिम अध्यक्ष नन्दराज भट्टकाले जानकारी दिए ।

उनले छ वडाध्यक्ष र अन्य वडाहरूमा पनि एउटा वडा सदस्य माग गरेको बताए ।

‘हामीले गठबन्धनका दलहरू बिच सहमतिको आधारमा विभिन्न स्थानीय तहका ६ वडाध्यक्षमा दाबी गरेका छौँ । यो विषयमा अन्य दलहरू पनि सकारात्मक हुनुहुन्छ’ उनले भने, ‘तर, अझै सम्म पनि ठोस निर्णय भने भइसकेको छैन ।’

जनमोर्चाले सहमति नभएको अवस्थामा एकल रूपमा भए पनि निर्वाचनमा जना सक्ने विकल्पमा पनि छलफल प्रारम्भ गरेको छ ।

धनगढी उपमहानगर पालिका प्रमुखमा खडक बहादुर राना प्रमुख प्रमुखमा शोभामणि भट्टलाई जनमोर्चाले अघि सारेको छ ।

त्यस्तै गोदावरीको प्रमुखमा हरिकृष्ण पाण्डे र उपप्रमुखमा रेणुका विक, गौरीगङ्गा प्रमुखमा गङ्गाराम कँडेल र उपप्रमुखमा लक्ष्मी न्यौपाने रहेका छन् ।

त्यस्तै घोडाघोडीमा मेनुका खड्का प्रमुख, मेनुका सुनार उपप्रमुखका सिफारिस भएका छन् । लम्कीचुहामा मिलन शाही प्रमुख र हरिकला शाही उपप्रमुखमा सिफारिस भएका छन् जनकी गाउँपालिका प्रमुखमा रामकृष्ण रेग्मी सिफारिस भएका छन् ।

‘राष्ट्रिय जनमोर्चाले अधिकांश पालिकामा प्रमुख र उपप्रमुख सहित उम्मेदवारी घोषणा गरिसकेको छ’ भट्टले भने, ‘सहमति भए हामी छ वडाध्यक्षमा चित्त बुझाउँछौँ नत्र सबै ठाउँ उम्मेदवारी दिन्छौँ ।’

यस विषयमा आन्तरिक रूपमा गठबन्धनका दलहरू बिच पनि छलफल भइरहेको बताए ।