एमाले खोटाङले ९ स्थानीय तहमा टुङ्ग्यायो उम्मेदवार

खोटाङ । आसन्न वैशाख ३० गते हुने स्थानीय तह निर्वाचनको लागि नेकपा (एमाले) खोटाङले स्थानीय तहको उम्मेदवारको नाम टुङ्गो लगाएको छ ।

एमालेले दुई नगरपालिका र आठ गाउँपालिकामध्ये नौ वटा स्थानीय तहमा प्रमुख अध्यक्ष र उपप्रमुख उपाध्यक्षको उम्मेदवारको नाम टुङ्गो लगाएको हो ।

एमालेले दिक्तेल रुपाकोट मझुवागढी नगरपालिकाको प्रमुखमा कुमार प्रसाद आचार्य उपप्रमुखमा बिणादेवी राई, हलेसी तुवाचुङ नगरपालिकाको प्रमुखमा खडेन्द्र साङपाङको नाम सिफारिस गरेको छ भने उपप्रमुख खाली राखेको छ ।

ऐंसेलुखर्क गाउँपालिको अध्यक्षमा गिरेन्द्र बहादुर राई उपाध्यक्षमा पुष्पकला भुजेल, केपिलासगढी गाउँपालिकाको अध्यक्षमा कृष्णकुमार राई, उपाध्यक्ष खाली राखेको छ ।

रावावेसीं गाउँपालिको अध्यक्षमा हरिकुमार पोख्रेल, उपाध्यक्षमा कौशिला गुरुङको नाम सिफारिस भएको छ ।

यसै गरी दिप्रुङ चुइचुम्मा गाउँपालिकाको अध्यक्षमा लोकेन्द्र राई र उपाध्यक्ष खाली, खोटेहाङ गाउँपालिकाको अध्यक्षमा कविता राई र उपाध्यक्षमा राजनकुमार बञ्जारा, जन्तेढुंगा गाउँपालिकाको अध्यक्षमा शंखर बहादुर राई र उपाध्यक्षमा विमला राई, वराहपोखरी गाउँपालिकाको अध्यक्षमा गोमा मगर र उपाध्यक्ष खाली राखेर सिफारिस गरेको नेकपा एमाले खोटाङका सचिव कुमार प्रसाद आचार्यले बताए ।

वैशाख ३ गते सचिवालयको बैठकबाट उम्मेदवार छनौट तथा सिफारिस गर्न कार्यदल बनाइएको थियो । जिल्ला कमिटी खोटाङको उम्मेदवार छनौट तथा सिफारिस कार्यदलको वैशाख ४ गते बसेको बैठकले ७९ वटै वडाका उम्मेदवार तथा ९ वटा पालिकाको उम्मेदवारहरुको सर्वसम्मतले नाम टुङ्गो लगाएर सिफारिसको लागि प्रदेशमा वैशाख ५ गते नै पठाएको आचार्यको भनाइ छ ।

साकेला गाउँपालिकाको अध्यक्ष र उपाध्यक्ष तथा अन्य पालिकामा खाली रहेका उपाध्यक्ष पदका उम्मेदवारको नाम र वडाको पनि आज साँझसम्म टुङ्गो लगाइने एमालेले जनाएको छ ।