नेकपा एसबाट पोखरामा धनराज आचार्य, हेटौंडामा मीना लामा मेयर उम्मेदवार ‘फाइनल’

काठमाडौं । नेकपा एकीकृत समाजवादीले आफूले पाएको एउटा महानगरपालिका र एक उपमहानगरपालिकाको टिकट टुंगो आज लगाउँदैछ । सत्ता गठबन्धनको भागबन्डामा उसले ६ महानगरमध्ये पोखरा र ११ उपमहानगरमध्ये हेटौंडाको प्रमुख पद पाएको छ ।

जसमा निर्वाचन लड्ने उम्मेदवारको टुंगो लगभग लागिसकेको नेकपा एस स्रोतले जनाएको छ । पोखरा महानगरपालिकाको प्रमुखको उम्मेदवारमा धनराज आचार्य र हेटौंडाको प्रमुखमा मीना लामालाई उम्मेदवार बनाइने उक्त स्राेतले बताएको छ ।

पोखरामा ६ जना आकांक्षी थिए । उनीहरूमध्ये आचार्यको नाममा टिकटको टुंगो लागेको स्रोतले बतायो ।
यस्तै हेटाैंडा उपमहानगरपालिका प्रमुखमा लामालाई उम्मेदवार बनाउने सहमति भएको पार्टी स्रोतले जानकारी दिएको छ ।
दुवै उम्मेदवारकाे नाम आधिकारिक घोषणा भने हुन बाँकी छ ।