ओखलढुङ्गामा गठबन्धनबाट बाहिरियाे जसपा
![](https://www.nepalpress.com/wp-content/uploads/2020/11/nepalpress-logo-n.png)
![](https://www.nepalpress.com/wp-content/uploads/2022/02/jasapa-jsp-jaanata-samajwadi-party-nepalpress.jpg)
काठमाडौं। ओखलढुङ्गामा जनता समाजवादी नेपालले गठबन्धनबाट बाहिरिएको घोषणा गरेको छ । जसपाले एक विज्ञप्ति जारी गर्दै पाँचदलीय गठबन्धनभन्दा बाहिर रहेर चुनाव लड्ने जनाएको हो ।
स्वार्थ बोकेका दलसँग सहकार्य गर्न नसकिने जनाउँदै आगामी निर्वाचनमा एक्लै चुनाव लड्ने र पार्टीको यो निर्णयले जिल्लामा पार्टीप्रति आस्था राख्ने नेता, कार्यकर्ता र शुभचिन्तकहरूमा खुसी छाएको पार्टी अध्यक्ष खेमराज खड्काद्वारा हस्ताक्षरित विज्ञप्तिमा उल्लेख छ ।
जिल्लामा कांग्रेस र माओवादीले बलमिच्याइँ गर्दै एकलौटी निर्णय गरेकाले गठबन्धनभित्र रहन नसक्ने जसपा नेता नरेश नेम्वाङले बताए । उनले अब एमालेसँग चुनावी तालमेल हुनसक्ने जानकारी दिए ।
स्थानीय तहको निर्वाचन लक्षित गठबन्धनका बैठकमा सहभागी भए पनि पछिल्लो समय कांग्रेस र माओवादीले गठबन्धनको मर्म र भावनाविपरीत आफूखुसी भागबन्डा गरेकाले जसपा गठबन्धनबाट बाहिरिएको उनले नेपाल प्रेससँग बताए ।
उनका अनुसार एमालेसँग खिजीदेम्बामा प्रमुख र मानेभन्ज्याङमा उपप्रमुख लिएर चुनावी मैदानमा जान सकिने सम्भावना रहेको छ । जिल्लामा दुई गाउँपालिका र अन्य स्थानीय तहका केही वडामा जसपाको प्रभाव राम्राे रहेको छ ।