मोरङका १२ स्थानीय तहमा एमालेले टुंग्यायो उम्मेदवार

विराटनगर । आगामी वैशाख ३० मा हुने स्थानीय तहको निर्वाचनका लागि एमालेले मोरङका १२ स्थानीय पालिकाहरूमा उम्मेदवार टुंगो लगाएको छ ।

एमाले मोरङका अनुसार केही पालिकामा पुरानै जनप्रतिनिधि दोहरिएका छन् भने केहीमा नयाँ अनुहारले प्रवेश पाएका छन् ।

एमालेले कटहरी गाउँपालिकाको अध्यक्षमा सुवास सरदार र उपाध्यक्षमा सीता राजवंशी, ग्रामथान गाउँपालिकाको अध्यक्षमा शिवनारायण माझी र गुणावती धामी, बुढीगंगा गाउँपालिकाको अध्यक्षमा बलभद्र सरदार र उपाध्यक्षमा तुलसा विष्ट, लेटाङ नगरपालिकाको मेयरमा भुपेन्द्र लावती र उपमेयरमा कृष्णकुमारी निरौला, बेलबारीको मेयरमा ज्ञानेन्द्र सुवेदी, केराबारी गाउँपालिकाको अध्यक्षमा सुमन मिरिङछिनको नाम टुङ्ग्याएको छ ।

उर्लाबारी नगरपालिकाको मेयरमा गंगा खरेल र उपमेयरमा मिना पौडेलको नाम टुङ्ग्याएको छ ।

सुनवर्षी नगरपालिकाको प्रमुखमा श्याम गनगाई र उपप्रमुखमा मीराकुमारी दासको नाम टुङ्ग्याइएको छ ।

यस्तै रतुवामाई नगरपालिकाको प्रमुखमा दुर्गा विष्ट, उपप्रमुख दमयन्ता चुँडाल, रंगेली नगरपालिकाको प्रमुखमा दीलिप अग्रवाल र उपप्रमुखमा भूमा पराजुली निरौलाको नाम टुंगो लगाइएको छ ।

यस्तै धनपालथान गाउँपालिकाको अध्यक्षमा मसहरु मण्डल, जहदा गाउँपालिकाको उपाध्यक्षमा अनिता सोरेनको टुंगो लागेको छ ।रंगेली नगरपालिकाको प्रमुखमा दीलिप अग्रवाल, लेटाङ नगरपालिका र बेलबारीको मेयरमा ज्ञानेन्द्र सुवेदी दोहरिएका छन् ।

रंगेलीका मेयर अग्रवाल हालै मात्र माओवादी केन्द्र छाडेर एमालेमा प्रवेश गरेका थिए ।

एमाले मोरङका अध्यक्ष ऋषि केश पोखरेलले आइतबार र सोमबार उम्मेदवारी दर्ता हुने भएकाले बाँकी पालिकाका प्रमुख र उपप्रमुखको नाम आइतबार बिहान सम्म टुङ्ग्याउने बताए ।

कुल १७ स्थानीय तह रहेको मोरङमा विराटनगर महानगरपालिकासहित पथरी शनिश्चरे,सुन्दरहरैचा नगरपालिका सहित कानेपोखरी र मिक्लाजुङ्ग् गाउँपालिकाको प्रमुख र उपप्रमुखको नाम टुंग्याउन बाँकी छ ।

२०७४ को स्थानीय तह निर्वाचनमा एमालेले मोरङमा ५ वटा पालिकाको प्रमुख÷अध्यक्ष जितेको थियो । भने ५ वटा पालिकाको उपप्रमुख र उपाध्यक्षमा विजयी भएको थियो ।