कांग्रेसले माग्यो जनतासँग माफी, गल्ती नदोहोर्‍याउने प्रतिबद्धता

काठमाडौं । नेपाली कांग्रेसले जनतासँग माफी मागेको छ । स्थानीय निर्वाचनका लागि सार्वजनिक गरिएको संकल्प पत्रमार्फत कांग्रेसले जनतासँग माफी मागेको हो ।

संकल्प पत्रको प्रतिबद्धता खण्डमा कांग्रेसले विगतमा जान अञ्जानमा भएका त्रुटि र कमजोरीप्रति क्षमा माग्दै गल्ती दोहोरिन नदिने प्रतिबद्धता जनाएको हो ।

‘नेपाली कांग्रेस विगतमा सरकारको नेतृत्व गर्दा वा प्रतिपक्षको भूमिकामा जानीनजानी भएका त्रुटि, कमजोरीहरूप्रति जनतासमक्ष क्षमा माग्दै त्यसबाट शिक्षा लिएर तिनलाई फेरि दोहोरिन नदिने प्रतिबद्धता व्यक्त गर्दछ’, कांग्रेसको संकल्प पत्रमा भनिएको छ ।

संकल्प पत्रमार्फत कांग्रेसले संविधानको रक्षा र कार्यान्वयन र त्यसकै जगमा मुलुकलाई समुन्नतितर्फ डोर्‍याउनु नै आजको राष्ट्रिय जिम्मेवारी भएको भन्दै जिम्मेवारी बहन गर्ने अठोटसमेत व्यक्त गरेको छ ।