राप्रपाका केन्द्रीय उपाध्यक्ष गिरी बने वीरेन्द्रनगरको मेयर उम्मेदवार

काठमाडौं । राप्रपाले हेबिवेट नेतालाई स्थानीय चुनावमा उम्मेदवार बनाउने तयारी स्वरूप केन्द्रीय उपाध्यक्ष मुकुन्द श्याम गिरीलाई सुर्खेतको वीरेन्द्रनगर नगरपालिकाको मेयरमा अघि सारेको छ ।

प्रवक्ता मोहन श्रेष्ठका अनुसार जनताको चाहना र राप्रपाप्रतिको जनलहरलाई ख्याल राख्दै देशका सबै स्थानीय तहमा उम्मेदवार छनौटमा छलफल भइरहेको छ र सकेसम्म प्रभावशाली नेतालाई चुनावी मैदानमा पठाउँदै छ ।

श्रेष्ठले भने– अधिकांश उम्मेदवार छनौट भइसकेका छन्, आज साँझसम्म सबै तहको उम्मेदवारी टुंगोमा लगाउँछौँ, वीरेन्द्रनगरमा केन्द्रीय उपाध्यक्ष गिरीको उम्मेदवारी टुंगो लागेको छ ।

नेपालगन्ज उपमहानगरका मेयर रहेका महामन्त्री डा. धवल शमशेर राणा सोही नगरमा पुनः उम्मेदवार नबन्ने भएपछि चार दिनअघि मात्रै नेकपा माओवादी केन्द्रबाट राप्रपा प्रवेश गरेका नन्दलाल वैश्यलाई मेयरमा उम्मेदवार बनाउने राप्रपाले टुंगो लगाएको छ ।