केपी ओली र पिएस गुरुङ सरकारले गरेका काम नै पोखरामा जितको आधार : कृष्ण थापा

पोखरा । नेकपा एमालेबाट पोखरा महानगरपालिकाको मेयरका उम्मेदवार कृष्ण थापाले पार्टीको संगठन र एमालेका तीनै तहका सरकारले गरेका कामहरु नै आफ्नो जितको आधार भएको दाबी गरेका छन् ।

उम्मेदवारी दर्ताका क्रममा उपमेयर मञ्जुदेवी गुरुङसहित गएका थापाले केन्द्रमा केपी ओली नेतृत्वको सरकारले गरेका समृद्धितर्फ पाइला बढाउने कामहरू र प्रदेशमा पृथ्वीसुब्बा गुरुङ नेतृत्वको सरकारले गरेका कामले पोखरामा एमालेको पक्षमा जनमत बढेको दाबी गरे ।

गुरुङले उनलाई उम्मेदवार बन्नबाट रोक्न खोजेको भनिएका बेला उनले गुरुङ नेतृत्वको सरकारले गरेका कामले पोखरामा आफूहरूलाई थप सहज भएको बताए । उनले मानबहादुर जिसी र मन्जु गुरुङ नेतृत्वको पोखरा महानगरले गरेका कामहरूलाई आफूले अघि बढाउने बताए ।

प्रदेशसभा सदस्यबाट राजीनामा दिएर मेयरको उम्मेदवार बनेका थापा २०५४ तत्कालीन पोखरा उपमहानगरपालिकाको मेयर थिए भने २०४९ मा पनि मेयर उम्मेदवार बनेर कांग्रेसका भोला थापासँग पराजित भएका थिए ।

तस्बिर : नवराज सापकोटा ।