बुटवलमा खटपटले सँगै मनोनयनमा गएनन् गठबन्धनका उम्मेदवार

रुपन्देही । रुपन्देहीको बुटवल उपमहानगरपालिकामा प्रमुख प्रतिस्पर्धी रहेका नेकपा एमाले तथा गठबन्धन दलले उम्मेदारी दर्ता गराएका छन् । त्यसैगरी सत्तारुढ गठबन्धनमा रहेको जसपाले पनि मेयर तथा उपमेयरमा उम्मेदारी दर्ता गराएको छ भने राप्रपाबाट पनि मेयर उपमेयरमा उम्मेदारी दर्ता भएको छ ।

एमालेबाट मेयरमा बाबुराम भट्टराई र उपमेयरमा सावित्रा अर्यालले उम्मेदारी दर्ता गराएका छन् भने गठबन्धनबाट नेपाली कांग्रेसका खेलराज पाण्डेले मेयर तथा नेकपा एसका चिनबहादुर गुरुङले उपमेयरमा उम्मेदारी दर्ता गराएका छन् ।

एमालेका उपाध्यक्ष विण्णु पौडेलसहितका नेताहरु उम्मेदारी दर्ताको समयमा पुगेका थिए । बुटवल पौडेलको गृहनगर हो । एमाले नेता तथा कार्यकर्ताहरु शक्ति प्रदर्शनसहित निर्वाचन अधिकृतको कार्यालयमा पुगेका थिए ।

एमालेका उम्मेदार भट्टराईले नेकपा एमाले नेतृत्वमा अगाडि सारिएका विकासका योजनालाईं पूर्ण बनाउने र समृद्ध बुटवलका लागि दीर्घकालनि योजनासहितका प्रभावकारी काम गर्ने प्रतिबद्धता गरेका थिए ।

बुटवल उपमहानगरपालिकामा गठबन्धन दलको तर्फबाट नेपाली कांग्रेसका खेलराज पाण्डेले मेयर पदमा उम्मेदवारी दर्ता गराएका छन् । काँग्रेस नगर सभापतिसमेत रहेका उनले बुटवल उपमहानगरको निर्वाचन कार्यालयमा गएर सोमबार उम्मेदवारी दर्ता गएका हुन् ।

पाँच दलीय गठबन्धन गरे पनि कांग्रेसका उम्मे‍दवार हरु भने एकल रुपमै उम्मेदवारी दर्ताका लागि निर्वाचन आयोग पुगेका थिए । गठबन्धनमा उपमेयर उम्मेदवारको टिकट पाएका नेकपा एकीकृत समाजवादीका चिनबहादुर गुरुङभन्दा अघि नै पुगेर पाण्डेले उम्मेदवारी दर्ता गराएका हुन् ।

शक्ति प्रदर्शनसहित बुटवल बजारको बीचबाट निर्वानचन कार्यालय आएको टोलीमा गठबन्धन दलका कुनै पनि नेता कार्यकर्ता देखिएनन् । गुरुङ अन्तिम समयमा आफ्नो पार्टीको टोली लिएर दर्ता गर्न पुगेका थिए । यसअघि नै गठबन्धन दलको जनता समाजवादी पार्टी (जसपा)ले आइतबार मेयर र उपमेयर दुबै पदमा उम्मेदवारी दर्ता गराएको अवस्थामा गठबन्धनमा रहेका अन्य दलहरु समेत एकसाथ नआउनुले अर्को प्रश्न जन्माएको छ ।

पद बाँडफाँडको विषयमा गठबन्धन दलहरु भित्रै विभिन्न वडाहरुमा विवाद रहेको अवस्थामा सोमबारको यो दृश्यले गठबन्धनको संरचना कमजोर हुने देखिएको छ । कांग्रेसका तर्फबाट विभिन्न वडामा उम्मेदवारी दिनेहरुको समेत शक्ति प्रदर्शनसहित उपस्थिती रहेको थियो ।

उम्मेदवारी दर्ता गराउनु पूर्व सञ्चारकर्मीहरुसँग कुराकानी गर्दै पाण्डेले बुटवल सडक तथा पूर्वाधार बिकास आफ्नो प्राथमिकतामा रहने उल्लेख गरे ।यसअघि राप्रपाबाट मेयरमा मृगेन्द्र शेरचन र उपमेयरमा भगवती पाण्डेले उम्मेदारी दर्ता गराएका थिए ।

गठबन्धन भएपनि दर्ता गराउन एक्लाएक्लै पुगे

नेपाली कांग्रेस बुटवल उपमहानगरसमितिका सभापतिसमेत रहेका पाण्डे कांग्रेस लुम्बिनी प्रदेशका सभापति अमर सिंह पुनसहित निर्वाचन कार्यालय पुगेका थिए ।

गठबन्धनबाट उपप्रमुखको उम्मेदवार बनेका चिनबहादुर गुरुङ भने पाण्डेले मनोनयन दर्ता गर्दासम्म निर्वाचन कार्यालय पुगेका थिएनन् । उनी अन्तिम समयमामात्रै निर्वाचन कार्यालयमा पुगेका थिए । गठबन्धनमा जिल्लाका अन्य पालिका र वडासम्मको तालमेल नमिलेको भन्दै नेकपा एस असन्तुष्ट बनेको हो ।

पाँच दलीय गठबन्धन गरेपनि कांग्रेसका उमेदवारहरु निर्वाचन कार्यालय जाँदा गठबन्धनका अन्य दलका नेता कार्यकर्ताको उपस्थिति भने देखिएन ।

गठबन्धनमा उपप्रमुखको उम्मेदवारको टिकट पाएका गुरुङभन्दा अघि नै पुगेर पाण्डेले उम्मेदवारी दर्ता गराएका हुन् । यसअघि नै गठबन्धन दलको जनता समाजवादी पार्टी (जसपा)ले आइतबार प्रमुख र उपप्रमुख दुबै पदमा उम्मेदवारी दर्ता गराएको अवस्थामा गठबन्धनमा रहेका अन्य दलहरु समेत एकसाथ नआउनुले गठबन्धनभित्रै खटपट भएको आशंका गरिएको छ ।