जाजरकोटमा शिक्षक नछाडी उपमेयरको उम्मेदवार

काठमाडौं । निर्वाचन आयोगले सरकारी सेवा सुविधा प्रत्यक्ष रूपमा लिइरहेका व्यक्ति स्थानीय निर्वाचनमा उम्मेदवार बन्न नपाउने भनेको छ । उम्मेदवार बन्ने भए मनोनयन दर्ता अगाडि नै राजीनामा दिनुपर्ने नियम छ । र राजीनामा स्वीकृत भएपछि मात्रै उम्मेदवार बन्न योग्य भइन्छ ।

तर जाजरकोट जिल्लाको नलगाड नगरपालिकाको उपमेयरको उम्मेदवार तेजबहादुर खत्री शिक्षक पद कायम भएकै अवस्थामा उपप्रमुखको उम्मेदवार बनेका छन् ।

नलगाड नगरपालिका–२ घर भएका खत्री त्रिभुवन मावि खलंगाका निमावि तहका स्थायी शिक्षक हुन् । उनले राजीनामा दिए पनि स्वीकृत भएको छैन ।

नेपाली कांग्रेसबाट टिकट पाएर नलगाड नगरपालिकाको उपमेयरमा मनोनयन दर्ता गराएका खत्रीको राजीनामा स्वीकृत नभएको शिक्षा विकास तथा समन्वय इकाई जाजरकोटका कार्यालय प्रमुख रमेश मल्लले जानकारी दिए ।

खत्रीले १२ गते राजीनामा दिएको तर, घरपरिवारको नजिकको नाताको मान्छेले सनाखत गर्नु पर्ने भएको हुँदा उनको राजीनामामा कसैले पनि सनाखत नगरेका कारण राजीनामा स्वीकृत नभएको मल्लले नेपाल प्रेस सँग बताए ।

उनले भने, ‘१२ गते कार्यालयमा राजीनामा बुझाए पनि श्रीमतीको सनाखत नभएका कारण तुरुन्तै सनाखत गरेर ल्याउन आग्रह गरेर पठाइएको भए पनि उहाँ अहिलेसम्म सम्पर्कमा आउनु भएको छैन ।’

उनले राजीनामा पत्र बुझाए पनि उनकी श्रीमतीले सनाखत नगर्दा राजीनामा स्वीकृत हुन सकेको छैन ।