भीमसेनदास भन्छन्- गठबन्धनमा घात भए मुलुकमा अर्को द्वन्द्व सिर्जना हुन्छ

काठमाडौं । पूर्वमन्त्री एवं नेपाली कांग्रेस काठमाडौंका पूर्वसभापति भीमसेनदास प्रधानले यसपालीको निर्वाचन गठबन्धन भर्सेस एमाले रहेको बताएका छन् । काठमाडौं महानगरपालिकाका मेयर पदका उम्मेदवार सिर्जना सिंहको ‘संकल्प पत्र’ सार्वजनिक कार्यक्रममा बोल्दै उनले यस्तो बताएका हुन् ।

प्रधानले भने,‘यसपटकको चुनाव कांग्रेस भर्सेस एमाले होइन, माओवादी केन्द्र भर्सेस एमाले होइन, एकीकृत समाजवादी भर्सेस एमाले होइन कि गठबन्धन भर्सेस एमाले हो ।’

तर, गठबन्धन चुनाव हार्दा भने कांग्रेसकै पहिलो नम्बरमा नाक खुम्चने उनले बताए । ‘पहिलो नम्बरमा कांग्रेसकै नाक खुम्चिन्छ, त्यसपछि माओवादी केन्द्र र एकीकृत समाजवादीको नाक खुम्चने हो,’ उनले भने ।

अहिलेको गठबन्धन विशेष परिस्थितिका कारण बनेको बताउँदै नेता प्रधानले गठबन्धनमा घात भए मुलुकमा अर्को द्वन्द्व सिर्जना हुने बताए । उनले भने, ‘गठबन्धनमा घात-प्रतिघात भए अर्को द्वन्द्व सिर्जना हुन्छ । अर्को प्रतिगमन देशमा सुरू हुन्छ ।’

एमाले उम्मेदवार केशव स्थापित अत्यन्त अस्थिरता, अराजक र मनपरी बोल्ने व्यक्ति भएकाले त्यस्तो व्यक्ति महानगरको मेयर बन्दा महानगर दुर्घटनामा जाने उनले दाबी गरे ।