भरतपुरका बागी पौडेलले भने- सानो रुख भुइँकटहर लिएर आयौं, चारतारे झण्डा खोस्न पाउँदैनन्

चितवन । भरतपुर महानगरपालिकाको मेयरमा गठबन्धनविरुद्ध स्वतन्त्र उम्मेदवार बनेका कांग्रेसबाट निष्कासित नेता जगन्नाथ पौडेलले आफूहरु परम्परागत रुख चिन्हको साटो सानो रुख लिएर जनताबीच मत माग्न जाने बताएका छन् ।

निर्वाचन कार्यालयबाट भुइँकटहर चुनाव चिन्ह पाएपछि वीपी कोइरालाको शालिकमा माल्यार्पण गरेर चुनावी अभियान सुरु गरेका पूर्व सांसद पौडेलले २९ वटै वडामा ब्रिगेड खडा गरेर घरदैलो अभियान चलाउन कांग्रेस कार्यकर्तालाई निर्देशन दिए ।

पौडेलले भने–रुखको साटो सानो रुख भुइँकटहर लिएर जनतामा जाने हो। चारतारे झण्डा हाम्रो कसैले खोस्न सक्दैन। रसिलो र सबै रोगको औषधी पनि हो भुइँकटहर । अब जनताको घर घरमा यसलाई लिएर जानुपर्छ ।

पौडेलसँगै ८४ वर्षीय बयोबृद्ध नेता कृष्णलाल सापकोटासहित चितवनका कांग्रेस नेता कार्यकर्ता चुनावी अभियानमा सहभागी थिए । सहभागीले कांग्रेसको चारतारे झण्डा नै प्रयोग गरेका छन् ।