कस्तो हुनेछ केशव स्थापित र सुनिता डंगोलको रिबिल्ड काठमाडौं, रिभाइभ काठमाडौं ? (भिडिओ अन्तर्वार्ता)

काठमाडौं । देशको राजधानी काठमाडौं महानगर चुनावका बेला चर्चाको शिखरमा हुनु स्वाभाविक हो । काठमाडौंको चुनावी चर्चामा केशव स्थापित र सुनिता डंगोल दिनहुँजसो ट्रेन्डिङमा छन् ।

स्थापित र डंगोल एमालेबाट मेयर र उपमेयर उम्मेदवार बनेसँगै कहिले बोलीका कारण कहिले विपक्षीको प्रहारका कारण चर्चामा छन् । आ- आफ्नो स्वभाव र उमेर समूहका कारण पृथक चरित्र तथा चर्चामा रहेका स्थापित र डंगोल अहिले संयुक्त चुनावी अभियानमा छन् ।

२०५४ सालमा मेयर भएका बेला स्थापितले गरेका कामको जस लिइरहेको एमालेले यसपटक उनलाई उम्मेदवार बनाउनुको कारण पनि गठबन्धनविरुद्ध हेबिवेट हुनसक्ने बुझाइले नै हो ।

त्यस्तै सुनिता डंगोल भने युवा पुस्ताको प्रतिनिधि, काठमाडौंका सांस्कृतिक भाषिक अभियन्ता र निर्णायक मत बोक्ने ज्यापु समुदायको प्रतिनिधि हुन् । एमालेका यी दुई उम्मेदवारले गठबन्धनको सामना गरिरहँदा केशव स्थापितले आफूहरू जित्ने हिसाब सुनाए ।

नेपाल प्रेससँगको भिडिओ अन्तर्वार्तामा स्थापित र डंगोलसँग हामीले उनीहरूका योजना र रणनीतिबारे विस्तृतमा कुराकानी गर्यौं । यस क्रममा स्थापितले माइतीघर मण्डल, रत्नपार्कको शान्ति बाटिका, कलंकी कुलेश्वर सडक विस्तार,धोबीखोला कोरिडोरजस्ता आफ्नो अघिल्लो कार्यकालका काम स्मरण गर्दै यसपटक पार्क,सार्वजनिक यातायात, मनोरन्जनस्थल र पूर्वाधारको नयाँ खाले विकासका खाका सुनाए ।

उनी काठमाडौंको रिबिल्ड गर्न चाहान्छन् ।

त्यस्तै लिपी क्वीनका रूपमा समेत चर्चित उपमेयर उम्मेदवार सुनिता डंगोलले भने काठमाडौंको कला,संस्कृति र सम्पदाको ‘रिभाइभ’ गरेर पुरानै काठमाडौं बनाउने आफ्नो योजना सुनाइन् ।

लामो कुराकानीपछि काठमाडौंमा २०४३ सालदेखि लगातार चुनाव लड्दै आएका एमाले नेता स्थापितले यहाँको गणित सुनाए । उनका अनुसार काठमाडौं महानगरमा एमालेको संगठित मत ६० हजार छ । नेपाली कांग्रेसको ४५ हजार छ । त्यो भोट यसपटक घट्ने उनको दाबी छ ।

त्यस्तै उनले माओवादीको ८ हजार र नेकपा एकीकृत समाजवादीको ५ हजार भोट अनुमान गरे । बाँकी स्वतन्त्र मतहरू कता जालान् ? यसको बारेमा उनले व्याख्या गर्न चाहेनन् तर तीमध्ये अधिकांश मत आफूहरूले तान्ने पुरानै ‘टेक्निक यूज’ गर्ने बताए । त्यो टेक्निक भने उनले सुनाउन चाहेनन् ।

प्रस्तुत छ, स्थापित र डंगोलसँग प्रधान सम्पदक मात्रिका पौडेलले गरेको भिडिओ अन्तर्वार्ता: