सिरहामा माओवादीका बागी उम्मेदवार महतोसहित छ नेता कारबाहीमा

जनकपुरधाम । नेकपा माओवादी केन्द्रले सिरहामा बागी उम्मेदवार बनेका रामचन्द्र महतो ‘कोइरी’सहित छ नेतालाई कारबाही गरेको छ ।

गोलबजार नगरपालिकामा माओवादीका बागी मेयर उम्मेदवार महतो, उपमेयर उम्मेदवार वास्ना मोक्तान, नेताहरू प्रवेश लामा, मनोज सिंह, कमल स्याइवो र पुजन सिंह कारबाहीमा परेका हुन् । माओवादी मधेस प्रदेशका इन्चार्ज गणेश शाहले विज्ञप्ति जारी गरेर उनीहरुलाई साधारण सदस्यसमेत नरहनेगरी कारबाही गरेको जनाएका छन् ।

गोलबजार नगर समिति, सिराहाबाट कारबाहीको लागि सिफारिस भइ आएको र उनीहरुलाई पार्टी अनुशासन पालना नगरेको देखिएकोले पार्टी विधानको धारा ११ को दफा १ (ग) अनुसार पार्टी केन्द्रको निर्देशन बमोजिम कारबाही गरिएको विज्ञप्तिमा उल्लेख छ ।

गोलबजार नगरपालिकामा माओवादीले निवर्तमान मेयर देवनाथ साहलाई नै पुनः उम्मेदवार बनाएको छ । उनी माओवादी स्थायी कमिटी सदस्य विश्वनाथ साहका भाइ हुन् । उनलाई पहुँचक आधारमा पुनः टिकट दिएको भन्दै महतोले प्यानल बनाएर बागी उम्मेदवारी दिएका हुन् ।