प्यूठानको झिमरुकमा भत्कियो जनमोर्चाको किल्ला, अध्यक्षमा माओवादी र उपाध्यक्षमा कांग्रेसकाे जित

रूपन्देही । अहिलेसम्म राष्ट्रिय जनमोर्चाबाहेक कसैले जित निकाल्न नसकेको प्यूठानको झिमरुक गाउँपालिकामा नेकपा एमालेसँगको गठबन्धनमा माओवादी केन्द्रले जितेको छ ।

तर गठबन्धनमा उपाध्यक्ष पाएको एमालेका उम्मेदवारलाई साथ नदिएर कांग्रेसलाई साथ दिएको एमालेको आरोप छ । जनमोर्चालाई हराउन पाँच दलको गठबन्धन छोडेर एमालेसँग गठबन्धन गरेको माओवादीले उपाध्यक्षमा साथ नदिएको एमाले कार्यकर्ताको गुनासो छ ।

झिमरुक गाउँपालिका अध्यक्षमा माओवादीका पितबहादुर एम्सी विजयी भएका छन् । उपाध्यक्षमा राष्ट्रिय जनमोर्चा र कांग्रेसबीचको गठबनधनबाट कांग्रेसका प्रमोद पोखरेल विजयी भएका छन् ।

बहुदलीय व्यवस्थापछि यहाँ जनमाेर्चालाई कुनै दलले जित्न नसकेको अवस्थामा अहिले माओवादीले जितेको स्थानीय बताउँछन् ।

जनमोर्चाले भने माओवादीको दोहोरो रणनीतिका कारण पाँच दलको गठबन्धन नभएको आराेप लगाउँदै आएको छ । यहाँको गठबन्धन मिलाउन पाँच दलका शीर्ष नेताहरूकै बैठक बसेकाे थियाे । तर, मिलाउन सहमति जुट्न सकेन ।

झिमरुक नेकपा मसालका महामन्त्री मोहनविक्रम सिंहको गृहपालिका हो ।