रामग्राममा मेयर एमाले र उपमेयर राप्रपा विजयी

रुपन्देही । अघिल्लो स्थानीय तहको निर्वाचनमा नेपाली कांग्रेसले जितेको पश्चिमनवलपरासीको रामग्राम नगरपालिकामा एमालेले मेयर र राप्रपाले उपमेयर जितेको छ । नेपाली कांग्रेसबाट उम्मेदवार बनेका निवर्तमान मेयर नरेन्द्रकुमार गुप्तालाई पराजित गर्दै एमालेका धनपद यादव विजयी भएका हुन् ।

निवर्तमान मेयर गुप्ता एमालेका धनपद यादवसँग १ हजार ५३८ मतान्तरले पराजित भएका हुन् । गुप्ताले ६ हजार १९१ मत ल्याउँदा निर्वाचित मेयर पदका उमेदवार यादवले ७ हजार ७२९ मत ल्याएर विजयी भए ।

उपमेयरमा राप्रपाकी सम्झना चौधरी विजयी भएकी छन् । चौधरीले एमालेकी लक्ष्मी क्षेत्रीलाई ८५ मतको झिनो मतान्तरले पराजित गर्दै उपमेयरमा विजयी भएकी हुन् ।

निर्वाचित चौधरीको ६ हजार ४७१ आउँदा र क्षेत्रीले ६ हजार ३८६ मत पाइन्। कांग्रेसकी उपमेयरकी उम्मेदवार आराधना भट्टले ५ हजार ३४१ मत ल्याएर तेस्रो भएकी छन् ।