धरान उपमहानगरपालिका- गठबन्धनलाई चुट्दै अघि बढ्यो लौरो, अग्रता बढाउँदै

काठमाडौं । धरान उपमहानगरपालिकामा स्वतन्त्र उम्मेदवार हर्क साङपाङले अग्रता बढाउँदै लगेका छन् ।

आजबाट अग्रता लिनथालेका उनले सत्तारूढ गठबन्धनबाट उम्मेदवार बनेका नेपाली कांग्रेसका किशोर राईलाई निरन्तर पछाडि पार्दै लगेका छन् ।

लौरो चुनाव चिन्ह पाएका उनले पछिल्लो मत परिणाम अनुसार अग्रता फराकिलो बनाएका छन् । पछिल्लो ३२ हजार ७३५ मतगणनाको परिणाम अनुसार साङपाङको लौरोले ९ हजार ५४६ मत प्राप्त गरेको छ । उनलाई पछ्याइरहेका कांग्रेसका राईले मत ९ हजार २१९ मत प्राप्त गरेका छन् भने नेकपा एमालेका उम्मेदवार मञ्जु भण्डारीले ७ हजार ४०६ मत प्राप्त गरेकी छन् ।

उपमेयर तर्फ सत्तारूढ गठबन्धनबाट नेकपा माओवादी केन्द्रका अइन्द्र बेघाले १० हजार ४०७ मत प्राप्त गर्दा नेकपा एमालेका पदम लिम्बुले ९ हजार ९२८ मतसहित पछ्याइरहेका छन् ।