रंगेलीमा रोकिएको गणना सुरु हुन सकेन, पुनः मतदान हुनुपर्ने कांग्रेसकाे माग

विराटनगर । रंगेलीको मतगणना रोकिएको छ । गणनामा धाँधली भएको भन्दै नेपाली कांग्रेसले पुनः मतदानको माग राखेपछि गणना रोकिएको हो ।

कांग्रेसले गणना नै बहिस्कार गरेपछि राति २ बजेदेखि रोकिएको थियो । मत गणनाको क्रममा खसेको भन्दा बढी मत भेटिएपछि काँग्रेसले पुनः मतदानको माग गरेको हो ।

नेपाली काँग्रेसका तर्फबाट मेयरका उम्मेदवार मोदराज घिमिरेले एमालेको सहयोगमा मतगणनामा खटिएका कर्मचारीले मत गणनाका क्रममा धाँधली गरेकाले बताए ।

मेयरका उम्मेदवार घिमिरेका अनुसार शुक्रवार रंगेली नगरपालिका ७ को मतगणनाको क्रममा १०७ मत बढी फेला परेको बताए ।

कुल ३२४२ मत खसेको रंगेली ७ मा गणनाको क्रममा ३३४९ मत फेला परेपछि विवाद चर्किएपछि पुन निर्वाचन हुनुपर्ने माग राखेर काँग्रेसले मतगणना स्थल नै छाडेर हिँडेको थियो ।

रंगेलीका निर्वाचन अधिकृत रामहरी काफ्लेले कम्प्युटरमा मत प्रविष्ट गर्दा गडबडी भएको बताए ।

एमालेका मेयरका उम्मेदवार दिलीप अग्रवालले ७ हजार ५८५ मत प्राप्त गरेका छन् भने कांग्रेसका मेयरका उम्मेदवार मोदराज घिमिरेले ५ हजार ७८ मत मात्र प्राप्त गरेका छन् । गणना सम्पन्न भएका वडा सबै पाँच वटाको वडा अध्यक्ष एमालेले जितेको छ ।