निधिलाई स्वागत गर्न बागी मेयर विमानस्थलमा, सपथग्रहणमा कांग्रेस नेताहरू सहभागी हुँदै

जनकपुरधाम । जनकपुरधाम उपमहानगरपालिकाका नवनिर्वाचित मेयर मनोज साहको सपथग्रहण समारोहको प्रमुख आतिथ्य ग्रहण गर्न नेपाली पूर्वउपसभापति एवं कांग्रेस नेता विमलेन्द्र निधि आइपुगेका छन् ।

काठमाडौंबाट विमानमा जनकपुरधाम आएका नेता निधिलाई स्वागत गर्न नवनिर्वाचित मेयर साह र कांग्रेसका नेताहरू पुगेका थिए । निधिले विजयी भएकोमा साहलाई बधाई दिए ।

मेयर साहले आज उपमेयर, वडाध्यक्ष र सदस्यहरूलाई सपथग्रहण गराउने कार्यक्रम राखेका छन् । उक्त कार्यक्रमको प्रमुख अतिथिमा निधिलाई बोलाएपछि अन्य पार्टीबाट निर्वाचित जनप्रतिनिधिहरूले विरोध गर्ने स्रोतले जनाएको छ ।

सत्ता गठबन्धनको भागबन्डामा मेयर जसपालाई दिएपछि साह कांग्रेसको नगर सभापतिबाट राजीनामा दिएर चुनाव लडेका थिए । उनी निर्वाचित भएपछि पुन: कांग्रेसमा फर्किने संकेत गरेका छन् ।

हिजो जनकपुरधाममा निकालिएको उनको विजयी जुलुसमा कांग्रेस मधेस प्रदेशका संसदीय दलका नेता तथा भौतिक पूर्वाधार विकास मन्त्री रामसरोज यादव र जिल्ला सभापति योगेन्द्र पजियारसमेत सहभागी थिए ।