प्रदेश १ सभाको बजेट अधिवेशन सुरू

विराटनगर । प्रदेश १ सभाको १०औं तथा बजेट अधिवेशन सुरू भएको छ । आजबाट सुरू अधिवेशनमा आर्थिक मामिला तथा योजनामन्त्री इन्द्र आङ्बोले आर्थिक वर्ष २०७९/०८० को विनियोजन विधेयकमा समावेश हुने सिद्धान्त र प्राथमिकता सम्बन्धमा प्रस्ताव पेस गर्ने कार्यसूची छ ।

अहिले प्रदेश सभामा प्रतिनिधित्वल गर्ने राजनीति दलका नेताहरूले सम्बोधन गरिरहेका छन् । उनीहरूले जारी बजेट अधिवेशनमार्फत प्रदेशको नामाकरणको प्रस्ताव प्रदेशसभामा दर्ताका लागि सरकारको ध्यानाकर्षण गराएका छन् ।

बजेट अधिवेशनको महत्त्वपूर्ण बैठकमा भने अधिकांश सदस्य अनुपश्चित छन् । प्रमुख प्रतिपक्ष एमालेका धेरै जसो सांसद उपस्थित छैनन् । एमालेका १५ जना प्रदेशसभा सदस्य मात्र सहभागी छन् । ९३ जना सदस्य रहेको प्रदेश १ सभामा एमालेका ३९ जना, कांग्रेसका २१ जना, माओवादी केन्द्रका १६ जना, नेकपा एसका १० जना, जसपाका ३ जना, राप्रपा र संघीय लोकतान्त्रिक राष्ट्रिय मञ्चका १/१ सदस्य छन् ।