पोखरा महानगरको वडाध्यक्षमा ३ मतले हारेका थापाले हाले मुद्दा

पोखरा । पोखरा महानगरपालिका-१८ को वडाध्यक्षमा ३ मतले चुनाव हारेका एमालेका उम्मेदवार पुस्कलबहादुर थापाले मुद्दा दर्ता गरेका छन् ।

उनले चुनावमा खसेको मतभन्दा ९ मत कम भएको भन्दै त्यसको खोजीको मागसहित निर्वाचन आयोग, मुख्य निर्वाचन अधिकृतको कार्यालय, मुख्य निर्वाचन अधिकृत र नव निर्वाचित वडाध्यक्षलाई विपक्षी बनाएर मुद्दा दिएका हुन् ।

यो वडामा कांग्रेसका शिव तिमिल्सिनाले ३ मत अन्तरले चुनाव जितेका थिए । ५ हजार ८ सय ४३ मतदाता मध्ये यहाँ ४ हजार ३ सय ४८ मत खसेको थियो ।

गणनाका क्रममा ४ हजार ३ सय ३९ मत मात्र भेटिएको थियो । मतपत्र सर्टिङ गर्ने क्रममा नै ९ मत गायव पारिएको थापाको आरोप छ ।

थापाले गणना सकिएपछि मुख्य निर्वाचन अधिकृतको कार्यालयमा पुन: गणनाको मागसहित निवेदन दिएका थिए । तर, पुनः गणना हुन सकेन ।

`हारजित स्वाभाविक हो । लोकतन्त्रमा निर्णय मान्नुपर्छ,´ उनले भने, `तर खसेको मत त देखाउनुपर्‍यो नि । खसेको ९ मतको जवाफ चाहियो ।
उनले सत्यतथ्य छानबिन गरेर पुनः मतगणनाको माग राखेका छन् ।