१७ सय घरधुरीलाई मासिक पाँच हजार लिटर पानी निःशुल्क वितरण गर्दै नारायण नगरपालिका

सुर्खेत । दैलेखकाे सदरमुकाम नारायण नगरपालिकाले १७ सय धारामा मासिक पाँच हजार लिटरको दरमा निःशुल्क खानेपानी वितरण गर्ने भएको हो । नगर प्रमुख लोमन शर्माको अध्यक्षतामा बसेको नगर कार्यपालिकाको पहिलो बैठकले उक्त निर्णय गरेको हो ।

सदरमुकाममा नारायण नगर साना सहरी खानेपानी आयोजना ‘सहारे’ बाट १७ सयभन्दा बढी घरमा खानेपानीका धारा जडान भइसकेका छन् । पाँच सय धारा जडान हुने क्रममा छन् । सदरमुकामको बाक्लो बस्तीमा जेठको समयमा उक्त आयोजनाबाट प्रतिसेकेण्ड १२ लिटरको दरमा पानी उपलब्ध हुँदै आइरहेको छ ।

‘हामीले गरेको निर्णय साउन १ गतेदेखि लागू हुनेछ । यो निर्णयबाट कम्तिमा १७ सय घरधुरीका जनताले पाँच हजार लिटर पानी निःशुल्क रुपमा पाउनेछन् । यो भनेको प्रतिधारा एक सय पचास रुपैयाँ हो । त्यो पैसा हामी नगरपालिकाले नै तिरिदिन्छौं । पाँच युनिट पानीभन्दा बढी प्रयोग गर्ने घरले भने बढी लाग्ने महसुल बुझाउनुपर्ने हुन्छ ’, नगर प्रमुख शर्माले नेपालप्रेससँग भने, ‘हाम्रो नगरपालिकामा आन्तरिक आम्दानी करिब डेढ करोड हुन्छ । सोही आन्तरिक आम्दानीबाट वार्षिक ३० लाखभन्दा बढी महसुल हामी तिर्छौं ।’

उनले पानीको महसुल महँगो भएको र सर्वसाधारण जनताले सकेसम्म लाभ लिन पाउन भनेर यो निर्णय गरिएको बताए । ‘नगरमा अधिकांश नागरिकको अवस्था कमजोर छ । उहाँहरुले विभिन्न कर तिर्दातिर्दा हैरानी व्यहोर्नुपर्ने अवस्था छ । त्यो अवस्थाबाट मुक्त पार्न हामीले यो योजना ल्याएका हौं । यसबाट कम्तिमा दश हजार नागरिक लाभान्वित हुनेछन् ।’

यसका अतिरिक्त नगरपालिकाले टोल फ्री नम्बरसमेत सञ्चालनमा ल्याउने तयारी गरेको छ । ‘टोल फ्री नम्बरमा नगरपालिकाका गुनासा, नगरवासीका समस्या आउने अपेक्षा हाम्रो छ’, उनले भने, ‘ती गुनासा आएको खण्डमा त्यसलाई तदारुकताका साथ सम्बाेधन गर्ने गरी यो व्यवस्था गर्न लागेका हौं ।’