अब मोबाइल एप र वेबसाइटबाटै कोरियन भाषा परीक्षाको तयारी गर्न सकिने

काठमाडौं । वैदेशिक रोजगारीका लागि दक्षिण कोरिया जान चाहनेहरूको भाषा परीक्षा यस वर्षदेखि सीबीटी (कम्प्युटर बेस टेस्ट/युबिटी) अर्थात् कम्प्युटर प्रविधिबाट हुने भएको छ ।

अघिल्लो पटकसम्म पेपर बेसमा हुने परीक्षा अब कम्प्युटर प्रविधिबाट हुने भएसँगै परीक्षार्थीको सहजताका लागि टपिकईपिएस वेबसाइट र मोबाइल एप्लिकेशन सञ्चालनमा आएको छ ।

टपिक इपिएस डटकम topikeps.com वेबसाइट र टपिक इपिएस नामको मोबाइल एप्लिकेशनबाट परीक्षार्थीले प्रश्न पत्रको असीमित अभ्यास गर्न पाउने भएका छन् ।

इपिएस टपिकको यस वर्षको कृषि समूह अन्तर्गतको परीक्षा यही महिनाको १९ गतेबाट सुरु भैसकेको छ भने उत्पादन मूलक तर्फको परीक्षा पनि छिट्टै सुरु हुनेछ।

दक्षिण कोरिया सरकारले तोकेको परीक्षाको मापदण्ड अनुसार यस वर्षदेखि पढ्ने र सुन्ने विधिमा मात्र कम्प्युटर प्रविधिमार्फत परीक्षा हुन्छ । परीक्षा हुने विधि अनुसार नै टपिक इपिएस मोबाइल एप र वेबसाइटमा परीक्षार्थीले अभ्यास गर्न सक्नेछन् ।

टपिक इपिएस एप र वेबसाइटमा प्रयोगकर्ताले साइन अप गरेसँगै उनीहरूले परीक्षणका निम्ति निःशुल्क प्रश्नपत्र अभ्यास गर्न पाउँछन् भने सशुल्क रूपमा प्रश्नपत्रहरुको सेट खरिद गरी असीमित अभ्यास गर्न पाउने वेबसाइट र मोबाइल एप्लिकेशनको निर्माता कम्पनी माकुरा क्रियसन्स प्रालिका प्रबन्ध निर्देशक स्वागत भेटुवालले जानकारी दिए ।

उनका अनुसार यस प्रविधि सामान्य प्रयोगकर्ताले मात्र नभई विभिन्न इन्स्टिच्युटहरूले पनि प्रयोग गर्न सक्नेछन् ।

इन्स्टिच्युटहरूले यस वेबसाइट र मोबाइल एप्लिकेशनमा आफ्नो शाखाको सम्बन्धन लिएर खातामा लगइन गरी विद्यार्थीहरूलाई अभ्यास गराउन सक्ने छन् ।

इपिएस टपिक डटकम वेबसाइट र मोबाइल

एप्लिकेशनमा कोरिया सरकारले लिने परीक्षाको ढाँचामा नै परीक्षाको अभ्यास गर्न सकिने भएकाले यो प्रभावकारी हुनसक्ने विश्व भाषा क्याम्पसका कोरियन भाषाका अध्यापक थानेश्वर बञ्जाडेले बताए । कम्प्युटररयुबिटी प्रविधिमा अभ्यास गर्दा परीक्षाका बेलामा झनै सहज हुने बञ्जाडेको भनाइ छ।

यस मोबाइल एप र वेबसाइटको निर्माण माकुरा क्रियसन्स प्रालि र हिमालयन ग्रुप अफ इन्स्टिच्युटले संयुक्त रूपमा निर्माण गरेको हो ।

इपिएस टपिकको वेबसाइट र एन्ड्रोइड एप सञ्चालनमा आइसेकेको छ भने आइओएस एप्लिकेशन भने केही दिनमै सञ्चालनमा आउने निर्माणपक्षले जानकारी दिएको छ ।

माकुरा क्रियसन्स एक दशकदेखि सूचना प्रविधिको क्षेत्रमा काम गरिरहेको संस्था हो भने हिमालयन ग्रुप अफ इन्स्टिच्युट भने कोरियाबाट फर्किएका व्यक्तिहरूद्वारा सञ्चालित शैक्षिक लगायत विभिन्न क्षेत्रमा क्रियाशील भएको छाता संस्था हो।