जसपा विवादको कारक उपेन्द्र भन्दै राईले भने- ६ महिनापछि मन्त्री फेर्ने कुरा थियो (भिडिओ)

काठमाडौं । जनता समाजवादी पार्टी, नेपालका सांसद मोहम्मद इस्तियाक राईले अहिले पार्टीभित्र देखिएको विवादको मूल कारक अध्यक्ष उपेन्द्र यादवको एकलौटी निर्णय भएको बताएका छन् ।

बिहीबार संसद भवन नयाँ बानेश्वरमा सञ्चारकर्मीसँग कुरा गर्दै राईले मन्त्री परिवर्तन गर्न गुटगत भेला गरिएको र पार्टी फुटाउने कुरामा सत्यता नरहेको दाबी गरे ।

आफूलाई मन्त्री बन्न कुनै इच्छा नभएकाले यस विषयमा अनावश्यक रूपमा नमुछ्‌न उनको आग्रह थियो । राईले सरकार गठन हुँदा अध्यक्ष यादवले संसदीय दल र केन्द्रीय कार्यकारिणी बैठकमा ६ महिनाका लागि मात्र मन्त्री बनाइएको र त्यसपछि नयाँ व्यक्तिलाई पठाउने मौखिक रूपमा बताएको जानकारी दिए ।

अध्यक्ष यादवले पार्टीलाई व्यक्तिगत रूपमा सञ्चालन गरेको र जसका कारण स्थानीय तहको निर्वाचनमा त्यसको असर देखिएको उनको टिप्पणी थियो ।

‘निर्वाचनको समीक्षा गर्न पनि अध्यक्ष तयार हुनुभएको छैन । पार्टीलाई एक व्यक्तिको आधारमा नभएर सामूहिकतामा चलाउनु आवश्यक छ’, राईको भनाइ छ ।