रामवीरको माग-मेयरको टिकट पाइँन, मेरो अध्यक्षतामा फोहोरमैला व्यवस्थापन संसदीय समिति गठन गरौं (भिडिओ)

काठमाडौं । नेकपा एमालेका सांसद रामवीर मानन्धरले मेयर बनेर काठमाडौंको फोहोर मैला व्यवस्थापन गर्ने आफ्नो चाहना पूरा नभएको भन्दै आफ्नो अध्यक्षतामा संसदीय समिति बनाउन माग गरेका छन् ।

प्रतिनिधिसभाको शुक्रबारको बैठकमा शून्य समयमा बोल्दै सांसद मानन्धरले काठमाडौंको फोहोरमैला व्यवस्थापनका लागि आफ्नो अध्यक्षतामा संसदले समिति बनाउन माग गरेका हुन् । फोहोरमैला व्यवस्थापन गर्न इच्छाशक्ति चाहिने र त्यो व्यक्ति आफूमा मात्र रहेको उनको दाबी छ ।

उनले भने, ‘काठमाडौं महानगरपालिकाको मेयरको आकांक्षी म पनि थिएँ तर टिकट पाइनँ । अहिले नयाँ नेतृत्व आएको एक महिना भइसक्यो तर काठमाडौंमा फोहोरमैलाको समस्या झनै बढेको छ । त्यसैले मेरो अध्यक्षतामा फोहोरमैला व्यवस्थापन संसदीय समिति गठन गरियोस्, म समाधान गर्छु ।’

सांसद मानन्धरले एमालेबाट मेयरको टिकट नपाएपछि घोषित रूपमै कांग्रेस उम्मेदवार सिर्जना सिंहलाई समर्थन गरेका थिए । उनलाई एमलोले कारबाही भने गरेको छैन ।