सिक्किममा ‘कबड्डी ४’को प्रदर्शनमा रोक

काठमाडौं । भारतको सिक्किम सरकारले नेपाली फिल्म ‘कबड्डी ४’को प्रदर्शनमा रोक लगाएको छ ।

सिक्किमका जनता र विभिन्न संघसंस्था र संगठनहरूको भावनालाई ध्यानमा राख्दै कबड्डी ४ रिलिजमा प्रतिबन्ध लगाउने सिक्किम सरकारले निर्णय गरेको हो ।

सिक्किमका मुख्यमन्त्री प्रेमसिंह तामाङले सिक्किमका जनता र विभिन्न संघसंस्था र संगठनहरूको भावनालाई ध्यानमा राख्दै राज्य सरकारले विवादलाई स्वीकार्य रूपमा समाधान नभएसम्म राज्यमा कबड्डी ४ रिलिजमा प्रतिबन्ध लगाउने निर्णय गरेको बताएका छन्।

बौद्ध भिक्षु फुर्वा तामाङ र अभिनेत्री मिरुना मगर बीचको तनावको कारण पछिल्लो समय विवादमा तानिएको नेपाली कथानक चलचित्र कबड्डी ४ ले फिल्ममा बौद्ध धर्म र भिक्षुलाई अन्याय गरेको भन्दै सिक्किममा उक्त फिल्मको प्रदर्शनमा रोक लगाउन माग गरिएको थियो ।

सिक्किमका बौद्ध धर्मगुरु ओङ्दी पिन्त्सोले गत जेठ २२ गते गान्तोकमा पत्रकार सम्मेलन गर्दै ‘कबड्डी ४’मा दयाहाङ राईले चित्रण गरेको लामाको चरित्रले सबै लामाको आस्थामा प्रहार गरेको बताउँदै उक्त फिल्म यदि सिक्किममा रिलिज भएको खण्डमा सबै लामाहरु सडकमा उत्रिने चेतावनी दिएका थिए।

सोही विवादका कारण सिक्किमका मुख्यमन्त्री प्रेम सिहं तामाङ गोलेले विवादको समाधान नभएसम्म फिल्म प्रदर्शनमा रोक लगाउने निर्णय गरेका हुन् ।