बालेन्द्रलाई सुनाउँदै वागमतीका अर्थमन्त्रीले भने : काठमाडौंको फोहोर बञ्चरेडाँडामा लैजान पाइन्न

काठमाडौं । वागमती प्रदेशका आर्थिक माामिला तथा योजना मन्त्री सालिकराम जमकट्टेलले काठमाडौंको फोहोरको भार अरू पालिकाले बोक्न नसक्ने जिकिर गरेका छन् ।

बञ्चरेडाँडामा काठमाडौंको फोहोर फाल्न नदिने उद्घोषसमेत उनले गरे ।

काठमाडौंका मेयर बालेन्द्र साह र उपमेयर सुनिता डंगोलकै सामुन्ने जमकट्टेलले यस्तो बताएका हुन् ।

हिजो हेटौँडामा बाग्मती प्रदेशले आयोजना गरेको अभिमुखीकरण कार्यक्रममा काठमाडौंका मेयर र उपमेयर पनि सहभागी थिए । मुख्यमन्त्री राजेन्द्र पाण्डेले कार्यक्रमको प्रमुख आतिथ्यता गरेका थिए ।

जनप्रतिनिधिहरूलाई अभिमुखीकरण गर्ने कार्यक्रममा अर्थमन्त्री जमकट्टेल भने काठमाडौं महानगरमाथि खनिए ।

उनले एउटा पालिकाले अर्को पालिकालाई हस्तक्षेप गर्न नमिल्ने भन्दै काठमाडौंका मेयरले बञ्चरेडाँडामा फोहोर फ्याँक्ने विषयमा गरेको समझदारीप्रति असन्तुष्टि जनाए ।

जमकट्टेलले भने, ‘काठमाडौंवासीले गरेको फोहोरको जिम्मा धादिङ र नुवाकोटका जनताले किन लिनुपर्ने ? यस्तो अब कदापि सैह्य हुँदैन । काठमाडौंले अब बञ्चरेडाँडामा फोहोर लैजान पाउँदैन ।’

जमकट्टेलले काठमाडौंको फोहोर काठमाडौंभित्रै व्यवस्थापन गर्नुपर्नेमा जोड दिए । कुहिने र नकुहिने फोहोर छुट्याएर व्यवस्थापन गर्न वडा–वडालाई जिम्मा दिनुपर्ने उनले बताए ।

जमकट्टेलपछि बोलेका मुख्यमन्त्री पाण्डेले भने केही सन्तुलित भनाइ राखे । उनले मन्त्री जमरकट्टेल भनाइ उनको व्यक्तिगत धारणा भएको स्पष्टीकरण दिएका थिए । यद्यपि, काठमाडौंको फोहोर बञ्चरेडाँडामा फाल्नु नै दिगो समाधान नभएको उनको पनि भनाइ थियो ।

जमरकट्टेल अभिव्यक्तिप्रति काठमाडौंका मेयर साह निकै आक्रोशित देखिएका थिए । जमकट्टेल बोल्दाबोल्दै उनी हलबाट बाहिरिएका थिए । उपमेयर डंगोल भने उठिनन् । यद्यपि उनी पनि जमकट्टलप्रति असन्तुष्ट देखिएकी थिइन् ।

अर्थमन्त्री जमकट्टेल धादिङ जिल्लाका प्रदेश सांसद हुन् ।

माओवादीका मजदुर नेता जमकट्टेलले २०७४ सालको प्रदेश चुनावमा वाम गठवन्धनबाट जित हासिल गरेका थिए ।