इन्दिरा र शरदको तीन वर्षे प्रेम यात्रा विवाहमा परिणत

काठमाडाैं । चर्चित गायिका इन्दिरा जोशी र प्रेमी शरद केडियाको विवाह समारोह सम्पन्न भएको छ । करिब तीन वर्षको लामो प्रेम यात्रालाई इन्दिरा र शरदले आज विवाहमा परिणत गरेका हुन् ।

विवाह सम्पन्न भए लगत्तै इन्दिराले आफ्नो सामाजिक सञ्जालमा आफूहरू आजदेखि आधिकारिक रूपमा पति र पत्नी भएको भन्दै दुवैको तस्बिर सार्वजनिक गरेकी छिन।

चितवनको बाराही जंगल लजमा समापन भएको उक्त विवाह समारोहमा दुवैतर्फका परिवार र आफन्त सहित सीमित व्यक्तित्वहरू मात्र उपस्थित थिए।

शरद पेसाले फेसन डिजाइनर हुन । शरदले डिजाइन गरेका ड्रेसहरू इन्दिराले थुप्रै कार्यक्रमहरूमा लगाएकी छिन्। गत वर्ष फेसन डिजाइनर शरद केडिया र गायिका इन्दिरा जोशी हेलिकप्टरबाट खुम्बु पुगेका थिए।

खुम्बु पुगेपछि शरदले इन्दिरालाई त्यहीँ नै विवाह प्रस्ताव राखेका थिए। इन्दिराले पनि सोही ठाउँमा विवाह प्रस्ताव स्वीकारेकी थिइन् ।

उनीहरू चढेर गएका हेलिकप्टरको क्याप्टेन विवेक थापाले आफ्नो टिकटक अकाउन्टमा उनीहरूको उज्ज्वल भविष्यको कामना गर्दै शरदले इन्दिरालाई प्रपोज गरेको भिडियो सार्वजनिक गरेका थिए।

खुम्बु पुगेपछि इन्दिरा जोशीको इन्गेजमेन्टको भिडियो त्यति बेला सामाजिक सञ्जालमा खुब भाइरल भएको थियो।